Kuvendi i Shqipërisë miratoi sot me 75 vota pro dekretin për “Kadastrën”.
Ai ishte shqyrtuar një ditë më parë në Komisionin e Ligjeve, pasi Presidenti Ilir Meta e ktheu më 15 janar për rishqyrtim në Kuvend. Në një argumemtim të gjatë dhe të detajuar kreu i shtetit argumentonte se disa nene të veçanta bien në kundërshtim me legjislacionin bazë të së drejtës civile në Shqipëri. Këshilltari ligjor i presidentit Meta, Bledar Dervishaj u shpreh dy ditë më parë, në komision se ligji cenon parimin e sigurisë juridike dhe se titujt e pronësisë nuk mund të jenë e drejtë e Kadastrës. “Krijohet tension kushtetues, nuk është në përputhje me jurisprudencën. Bie ndesh me dispozitat civile të Kodit Civil. Ligji cenon parimin e sigurisë juridike që ofronte ligji i mëparshëm. Saktësimi i titujve të pronësisë nuk mund të jetë e drejtë e kadastrës”, ishte shprehur ai.
Ligji “Për Kadastrën në Republikën e Shqipërisë”. parashikon shkrirjen e tre institucioneve të ALUIZNI-t, Zyrës Qendrore të Regjistrimit të Pasurive të Paluajtshme (Hipotekës) dhe Agjencinë e Inventarizimit dhe Transferimit të Pronave Publike (AITPP) në një të vetëm. Krijimi i një kadastre moderne do të thotë çlirim prej pasojave të një ngërçi në zinxhirin e pronësisë, që veç ndikimit në cilësinë e jetës të individëve dhe zhvillimin e vendit do të përmbushë këtë të drejtë kushtetuese.