Hapësire reklamuese

Aktualitet

Kush ishte Afërdita Selimi, zëri i Radio Tirana që s'do të dëgjohet më nga shqiptarët

Shkruar nga Newsbomb

Zëri që ka shoqëruar shqiptarët për vite me radhë në Radio Tirana për çështjet sociale dhe ekonomike nuk do të dëgjohet më.

Gazetarja e njohur e Radio Tirana, Afërdita Selimi mbylli sot sytë përgjithmonë. Afërdita u shua në moshën 68-vjeçare pas një beteje të gjatë më sëmundjen e rëndë të kancerit.

Sot bota e medias humbi një nga gazetaret më të jashtëzakonshme dhe kontribuese të shquar në fushën e informacionit dhe gazetarisë ekonomike.

Ceremonia e Homazheve për Afërdita Selimin do të mbahet në ambientet e RTSH, ditën e premte 23 Shkurt, ora 10:00-11:00, tek Holli i Radio Tiranës, në vendin ku ajo punoi gjatë gjithë jetës.

Por kush ishte Afërdita Selimi dhe cilat janë kontributete e saj në gazetari

Afërdita Selimi u lind në Tiranë në vitin 1955 dhe kreu arsimin e mesëm në gjimnazin Petro Nini Luarasi në vitin 1974.

Studimet e larta i zhvilloi në fakultetin e Shkencave Politike, Dega Gazetari, duke diplomuar në vitin 1977. Pas kësaj, ajo filloi rrugëtimin e saj në fushën e gazetarisë, fillimisht nga gazeta lokale "Shkëndia" në Lushnjë në vitin 1977 dhe më pas si gazetare në Radio Tirana në vitin 1981.

Gjatë kësaj periudhe dhe pas saj, Afërdita Selimaj u shqua për kontributin e saj në trajtimin e ngjarjeve dhe problematikave kryesore të ditës në radio dhe televizion, duke përfshirë kronika dhe shënime mbi ekonominë dhe zhvillimet aktuale.

Afërdita shquhej për përkushtimin në emisionet sociale-ekonomike, duke kontribuar me pasion edhe në shumë fusha të gazetarisë radiofonike dhe televizive. Aferdita ka qenë një ndër themelueset e gazetarisë ekonomike në Shqipëri, pas ndryshimit të sistemit.

Ajo, ka qenë frymëzim dhe mbështetje për të gjithë gazetarët, e veçanërisht ata të fushës ekonomike. Për të përmendur disa nga veprat që Aferdita i la pas, mund të veçojmë emisionet televizive në RTSH, si "Cikli Otranto 97", "Shqiptarët dhe fajdet", Telereportazhi "Expo 98 dhe Shqipëria", realizuar në Lisbonë te Portugalisë. Në vitin 2000, ajo u emërua Drejtore e Departamentit të Lajmeve në Radio Tirana, pozicioni që e mbajti deri në gusht të vitit 2003.

Në vazhdim, ajo ka drejtuar sektorin për bashkatdhetarët në Radio Tirana. Në vitin 2003, e zgjedhur nga Kuvendi i Shqipërisë, Afërdita ka qenë Kryetare e parë e Bordit të Monitorimit të Medias, pranë KQZ-se. Gjithashtu, gazetarja e RTSH-së Afërdita Selimaj, ka qenë e vetmja gazetare pranë ekipit negociator shqiptar në Gjenevë, për antarësimin e Shqipërisë në Organizatën Botërore të Tregtisë. Nga viti 1998 e në vazhdim, ka drejtuar Lidhjen e Gazetarëve Ekonomike të Shqipërisë, LEGA. Afërdita Selimaj në vitin 2021, nderohet nga Presidenti i Republikës së Shqipërisë me titullin “Mjeshtër i Madh” për kontributin e vyer si gazetare dhe drejtuese e Departamentit të Informacionit në ‘Radio Tirana’.

E para grua në krye të Lidhjes së Gazetarëve Ekonomikë të Shqipërisë, u shndërrua në një figurë të ndjekur brenda dhe jashtë vendit për zërin e spikatur dhe aftësinë në drejtimin e emisioneve të lajmeve. Përveç kësaj, i është dhënë çmimi "Vangjush Ganbeta" nga Unioni i Gazetarëve të Shqipërisë, për raportin më të mirë radiofonik, për problemet ekonomike.

U zgjodh Ambasadore e Paqes nga Federata Ndërkombëtare për Paqen në Botë në vitin 1999. Në 2011, ishte anëtare e trupit drejtues në Katalogun e sipërmarrjes së grave Shqiptare në Bruksel. Afërdita Selimaj, edhe pas daljes në pension, vazhdoi të kontribuojë në fushën e gazetarisë dhe informacionit përmes pjesëmarrjes në shumë programe dhe projekte mediatike.

Me ndarjen e saj nga jeta, humbëm një nga gazetaret më të jashtëzakonshme dhe kontribuese të shquar në fushën e informacionit dhe gazetarisë ekonomike. Ne kolegët e saj do ta vazhdojmë ta kujtojmë me respekt, duke e vlerësuar lartë kontributin e Afërdita Selimaj në zhvillimin e medias shqiptare.

Lexo edhe: Shuhet Afërdita Selimi, gazetarja e njohur e ekonomisë në Shqipëri

Sondazh

Poll

Lexo gjithashtu

Hapësire reklamuese