Një shqiptar ka dalë para gjykatës së Pontevedra në Spanjë dhe ka pranuar se ishte ai kreu i një bande që merrej me trafik ndërkombëtar droge.
Shqiptari i identifikuar si Afrim.H., doli bashkë me tre persona të tjerë para gjykatës. Ai tregoi se droga merrej në Valencia dhe para se të shpërndahej dërgohej në një banesë në Pontevedra. Ndaj të akuzuarve Prokuroria ka kërkuar 60 vite burg, ndërkohë që dënimi do të jepet në një seancë të mëvonshme.
Mediat vendase shkruajnë se të pandehurit kanë treguar se në dhjetor të vitit 2015 kishin marrë një sasi prej 10 kilogramësh heroinë në Valencia, të cilën e kishin mbajtur për një kohë të caktuar në dyshemenë e banesës së tyre në Sanxenxo, Pontevedra.
Ndërsa më pas kanë treguar se e kanë shpërndanë tek klientët e tyre, të cilët merreshin me shitje me pakicë. Ndërsa banesa e tyre ishte kthyer në një laborator droge, ku krahas lëndës narkotike u gjetën dhe armë dhe dokumente të falsifikuara.
Mësohet se për trafikun e drogës ata përdornin katër makina, të pajisura me vende të posaçme për fshehjen e drogës.