Hapësire reklamuese

Kulture & Art

Gazetari dhe publicisti Ilir Ikonomi vlerësohet me Çmimin “Lumo Skëndo”

Shkruar nga Newsbomb
Gazetari dhe publicisti Ilir Ikonomi vlerësohet me Çmimin
Publicisti Ilir Ikonomi

Ilir Ikonomi është vlerësuar me Çmimin "Lumo Skëndo" për veprën më të mirë publicistike e eseistike për vitin 2023, me librin biografik “Fan Noli-Apostulli”. Ajo është vlerësuar si vepra më e mirë në lëmin e publicistikës dhe eseistikës.

Me një punë kërkimore 10-vjeçare, Ikonomi sjell  biografinë e një prej figurave më të shquara të shek. XX,  të ndarë në tre vëllime. Autori rrëfeu disa nga episodet e takimeve mes Fan Nolit dhe Mit’hat Frashërit, dy figura të shquara të kombit.

Juria e kryesuar nga Arlinda Dudaj dhe me anëtarë Uran Butka, Belina Budini, Bledar Kurti dhe Ardit Gjinali e vlerësuan veprën publicistike të Ilir Ikonomit me motivacionin: “Për trajtesën me objektivitet dhe profesionalizëm të jetës dhe veprës së personalitetit të shquar të kombit Fan S. Noli, duke dhënë gjithashtu një mesazh të rëndësishëm sesi studimi i historisë dhe kulturës së të shkuarës, na ndihmon për të kuptuar të tashmen e të ardhmen”.

Ben Blushi dorëzoi trofeun e Çmimit Kombëtar “Lumo Skëndo” për vitin 2023 dhe tha se Shqipëria ka pasur dhe ka historianë, por historian, që ta shkruajë më bukur historinë se Ilir Ikonomi nuk ka. Blushi i cili e fitoi këtë çmim më 2022-shin, vlerësoi autorin e veprës “Fan Noli-Apostulli”, duke shtuar: “Nëse ne të tjerët shkruajmë, Ilir Ikonomi studion”.

Gazetari dhe publicisti Ilir Ikonomi vlerësohet me Çmimin
Ben Blushi dhe Ilir Ikonomi

I themeluar më herët nga Biblioteka Kombëtare, prej tre vitesh Çmimi “Lumo Skëndo” organizohet dhe akordohet nga Qendra Kombëtare e Librit dhe Leximit.

Në botimin e vëllimit të parë, Ilir Ikonomi zbuloi se i ishin dashur dhjetë vite punë kërkimore në mbledhjen e materialeve arkivore, dokumente, letërkëmbim, artikuj nga shtypi i kohës, duke shfrytëzuar Arkivin Kombëtar të Shteteve të Bashkuara të Amerikës, në Merilend, Bibliotekën e Kongresit në Uashington, arkivat e Ministrisë së Jashtme të Austrisë e të tjera.

Një punë, e cila nuk mund të përmblidhej në një vëllim të vetëm, ndaj autori vendosi ta sjellë figurën e Fan Nolit të ndarë në tri etapa të rëndësishme të jetës dhe veprimtarisë së tij.

Gazetari dhe publicisti Ilir Ikonomi vlerësohet me Çmimin
Ilir Ikonomi me jurine e çmimit "Lumo Skëndo"

Shtëpia botuese UET PRESS u përfaqësua denjësisht në këtë edicion me emra si Ilir Ikonomi, Natasha Lako, Blendi Fevziu, Migjen Kelmendi e Namir Lapardhaja, ndërsa për vetë natyrën e një shtëpie botuese universitare i kushton vëmendje të veçantë botimeve publicistike e atyre studimore.

Të gjithë autorët janë përzgjedhur në dhjetëshen gjysmëfinaliste, ndërsa tre prej tyre si: Lako, Fevziu dhe Ikonomi, ishin pretendentë në pesëshen finaliste.

Sondazh

Poll

Lexo gjithashtu

Hapësire reklamuese