Ministrat e Brendshëm të Bashkimit Evropian kanë votuar për pranimin e Kroacisë në zonën Shengen me 26 vende, pa kufij, por kanë refuzuar Rumaninë dhe Bullgarinë. Votimi u prit me lehtësim në Zagreb, por zemërim dhe shqetësim në Bukuresht dhe Sofje.
Ministri i Jashtëm i Gjermanisë tha se ishte një ditë e keqe për Evropën. Komisioni Evropian kishte mbështetur të tre vendet që plotësonin kriteret e nevojshme për t’u bashkuar me zonën, e cila përfshin 420 milionë njerëz.
“Unë jam gjithashtu i zhgënjyer,” tha komisionerja e çështjeve të brendshme të BE, Ylva Johansson. Kroacia u bashkua me BE në 2013; Rumania dhe Bullgaria u bënë shtete anëtare gjashtë vjet më parë.
Kryeministri kroat Andrej Plenkoviç vlerësoi vendimin, që do të thotë se Kroacia do të çmontojë pikat e saj kufitare me fqinjët e BE-së, Slloveninë dhe Hungarinë në 1 janar, në të njëjtën ditë kur ajo bashkohet me euron.
E krijuar në vitin 1985, zona Shengen lejon njerëzit dhe mallrat të udhëtojnë lirshëm, zakonisht pa treguar dokumente udhëtimi ose doganore. Zona përfshin 22 nga 27 shtetet e BE-së, si dhe Norvegjinë, Zvicrën, Islandën dhe Lihtenshtajnin.
