Sot presidenti i FIFA-s Gianni Infantino mbërrin në Tiranë në mesditë, në një vizitë me dy qëllime, festimet e 90 vjetorit të marrëdhënieve mes Federatës Shqiptare të Futbollit dhe FIFA dhe së dyti, inaugurimi i Shtëpisë së Futbollit, selia ku është vendosur sot FSHF-ja, me kontribut të përbashkët të qeverisë shqiptare që dha truallin dhe fondet e dhëna nga Fifa nëpërmjet projektit Fifa Forward, raporton Newsbomb.al.
Zyra e shtypit e FSHF informon se Gianni Infantino do të ketë një takim me kryeministrin Edi Rama, i shoqëruar nga ministrja e Arsimit dhe Sporteve Evis Kushi, ndërkohë që presidenti i FIFA do të jetë nën shoqërinë e kreut të FSHF-së, Armand Duka.
Më pas, gjatë pasdites, të gjithë bashkë do të shpalosin pllakatën në shtëpinë e futbollit.
Gianni Infantino është propozuar nga Komiteti Ekzekutiv i FSHF edhe për një mandat tjetër në krye të FIFA në zgjedhjet që pritet të mbahen vitin që vjen.
Gjatë këtij viti, presidenti i UEFA-s Ceferin ka ardhur disa herë në Shqipëri, njëherë përpara finales së Conference League në 25 maj dhe herën tjetër në ditën e ndeshjes mes Romës dhe Feynord, që ishte ndeshja kartolinë e zhvilluar në Shqipëri.
Për Infantinon, është një ndër vizitat e para zyrtare. FSHF hyn në një epokë të re të marrëdhënieve të ngushta me organizmat ndërkombëtare të futbollit, me një vëmendje të shtuar të këtyre të fundit në vendin tonë.