Pas konfirmimit në detyrë nga Vettingu dhe Komisioni i Pavarur i Kualifikimit(KPK) më 16 tetor të këtij viti, përzgjedhja e prokurorit Besim Hajdarmataj, është ankimuar nga Komisioneri Publik.
Mësohet se ankimimi për Hajdarmatajn ka ardhur pas rekomandimit të ONM-së (Operacionit Ndërkombëtar të Monitorimit)
Komisioneri Publik ka ankimuar në Komisionin e Pavarur të Apelimit (KPA), vendimin e KPK-së për prokurorin e shkallës së parë në Prokurorinë e Krimeve të Rënda.
Sipas Komisionerit Publik, vendimi për konfirmimin në detyrë të Besim Hajdarmatajt është i cënueshëm në tërësinë e tij dhe se përmban shkaqe të mjaftueshme ligjore për tu paraqitur në KPA.
Pjesë nga relacioni i Komisionerit Publik:
Komisioneri Publik sqaron se pasi shqyrtoi vendimin e mësipërm të Komisionit të Pavarur të Kualifikimit dhe rekomandimin e Operacionit Ndërkombëtar të Monitorimit për të paraqitur ankim, vlerëson se vendimi për konfirmimin në detyrë të subjektit të rivlerësimit, z. Besim Hajdarmataj është i cenueshëm në tërësinë e tij dhe përmban shkaqe të mjaftueshme ligjore për t’iu paraqitur juridiksionit kontrollues dhe rivlerësues të Kolegjit.
Nisur nga kjo, Komisioneri Publik kërkon që shkaqet e këtij ankimi të merren në shqyrtim nga ana e Kolegjit të Posaçëm të Apelimit dhe, në përfundim të shqyrtimit të çështjes në seancë publike, të vendosë ndryshimin e vendimit nr. 200, datë 16.10.2019, të Komisionit të Pavarur të Kualifikimit dhe shkarkimin nga detyra të subjektit të rivlerësimit, z. Besim Hajdarmataj.