Prokurorja Antoneta Sevdari, anëtare e Këshillit të Lartë të Prokurorisë ka dalë sot para Kolegjit të Posaçëm të Apelimit, pas ankimimit të Komisionerit Publik për vendimin e Komisionit të Pavarur të Kualifikimit.
Antoneta Sevdari u konfirmua në detyrë nga KPK-ja në 18 korrik të 2018 por Komisioneri Publik e ankimoi vendimin. Sipas Komisionerit Publik hetimi i KPK-së për Sevdarin nuk ishte i plotë.
Komisioneri Publik nëpërmjet këtij ankimi kërkon nga Kolegji i Posaçëm i Apelimit që këto mangësi të hetimit administrativ të kryer nga Komisioni i Pavarur i Kualifikimit të mund të riparohen nga Kolegji gjatë shqyrtimit të çështjes në seancë gjyqësore.
Në përfundim të seancës në Kolegjin e Posaçëm të Apelimit pritet vendimi për anëtaren e Këshillit të Lartë të Prokurorisë Antoneta Sevdari.