Një 27-vjeçar shqiptar është lënë në burg nga Gjykata e Irlandës së Veriut, pasi u kap në një fermë kanabisi në Angli.
Sipas medieve të huaja, Klinton Hysa dyshohet gjithashtu se është përfshirë edhe në një prej fermave më të mëdha të kanabisit në Irlandën e Veriut, e cila kap vlerën prej 200 mijë paundësh.
Për këtë arsye, ai është transferuar nga Britania e Madhe drejt Irlandës së Veriut.
Gjykata e Belfastit refuzoi lirimin me kusht të shqiptarit, pasi i druhet arratisjes së tij nga vendi.
Por sipas dosjes së prokurorisë, i riu shqiptar u zbulua pasi policia gjeti gjurmët e gishtërinjve në një nga radiatorët e përdorur për energjinë elektrike që shërbente për rritjen e bimëve narkotike.
Avokati mbrojtës i shqiptarit tha në gjykatë se klienti i tij vjen herë pas herë në Irlandën e Veriut ku punon si dekorues i pronave të ndryshme. Por gjykata nuk e mori parasysh këtë fakt, pasi kishte prova të forta kundër Hysës dhe si përfundim vendosën masën e sigurisë “arrest me burg” për të.
“Sasia e kanabisit që u gjet në këtë vend është jashtëzakonisht e madhe. Nëse e lëmë të lirë me kusht ai arratiset”, ka deklaruar gjykatësi. Për këtë arsye, Hysa është lënë në burg deri në pritje të një vendimi të dytë.