Hapësire reklamuese

Politikë

“Kalo këtej e sill pak atë plaçkën vëlla”, Manja denoncon inspektorët e AKU në Fier: Donin të vinin gjobë....(Thirrja për qytetarët)

Shkruar nga Newsbomb
“Kalo këtej e sill pak atë plaçkën

Ministri i Drejtësisë, Ulsi Manja në një deklaratë për shtyp ka denoncuar dy inspektorë të AKU në Fier.

Sipas tij inspektorët në mënyrë të padrejtë kanë dashur të gjobisin një qytetar nën maskën e shtetit, por që personi nuk ka pranuar të paguaj rryshfet duke bërë kështu denoncimin.

Manja tha se dosja do të dërgohet me emër dhe mbiemër në Prokurori dhe se do jenë ata që do të vendosin drejtësinë me rastin e ndodhur.

Ndër të tjera ministri u ka bërë thirrje qytetarëve që mos bien pre e presioneve, por të denoncojnë cdo rast, teksa paralajmëron se të martën do të denoncojë një rast tjetër këtë herë lidhur me hipotekën.

Fjala e plotë:

Ministri i Drejtësisë z.Ulsi Manja, në daljen e tij të parë para mediave që pas emërimit në këtë detyrë, ka bërë publike një prej rasteve të abuzimit me detyrën nga zyrtarë të shtetit, denoncuar nga qytetarët, zbardhur, faktuar dhe përcjellë në Prokurori nga Drejtoria Antikorrupsion në Ministrinë e Drejtësisë. Sipas z.Manja është një rast ku qytetari nuk është nënshtruar nga presioni i Taxhim Ymerëve të AKU-së së Fierit, por i ka denoncuar pranë Drejtorisë së Antikorrupsionit.

Më poshtë deklarata e plotë e Ministrit të Drejtësisë

Përshëndetje dhe faleminderit për praninë tuaj

Sot nis procesi i transparencës me publikun për punën e Njësisë Antikorrupsion të Ministrit të Drejtësisë.

Ky proces do të vazhdojë deri në fund të madatit të tretë dhe do të jetë një proces kapilar, profesional, me integritet të plotë dhe me tolerancë zero ndaj kujtdo që do na dalë përpara.

Rasti i sotëm, që po e përcjell para jush, është një nga 5 rastet e para, të cilin e kam zgjedhur dhe e kam ndarë nga të tjerët, sepse lidhet me një qytetar që nuk ka heshtur, nuk ka pranuar të japë rryshfet, nuk I është nënshtruar Taxhim Ymerit që i kërkonte bekajet, dhe që  meriton gjithë mirënjohjen dhe falenderimin tim dhe të qeverisë shqiptare dhe të KM Edi Rama. Eshtë shembulli që duhet ndjekur nga të gjithë qytetarët dhe bizneset. Të mos heshtin përpara Taxhim Ymerëve që u dërgojnë edhe fjalë: Nesër do kaloj andej, bëje gati atë plaçkën.

Ne na takon ta provojmë me forcën e shembullit tonë dhe fakteve se qytetarët jo vetëm që nuk duhet të kenë frikë t’i denoncojnë Taxhimët strukur qosheve e zyrave të shtetit, por duhet ta bëjnë këtë të bindur se na kanë në krahë deri në fund.

Mos heshtni! Sepse heshtja është mbështetje për këta, ndërkohë që fjala është rreshtim kundër tyre.

Fjalët e thëna, ankesat e bëra, qarjet dhe sharjet mbasi ke paguar rryshfetin janë legjitime nga pikpamja humane, por nuk janë të denja nga pikëpamja qytetare, nuk janë të denja nga pikëpamja demokratike dhe as nga pikëpamja prindërore, sepse kemi përgjegjegjësi  dhe për vendin që po ju trashëgojmë fëmijëve tanë, dhe nëse zgjatet zinxhiri i heshtjes, zgjatet edhe litari, që sot është në këmbët e prindërve, nesër do të jetë në këmbët e fëmijëve.

Po ju sjell rastin për të cilin fola pak më sipër:

Qytetari është vendosur nën presion nga disa inspektorë të AKU në Fier, por nuk ka rënë pre e presionit, nuk ka pranuar të paguajë.

Qytetari u është kundërpërgjigjur taxhimëve të AKU-së që e kanë gjobitur me vulën e instituicionit shtetëror, duke lajmëruar Njësinë antikorrupsion dhe menjëherë ne jemi vënë në dispozicion dhe sot gjobëvënësit me maskën e shtetit, por që nuk përfaqësojnë shtetin dhe shtetarin, nuk përfaqësojnë aspak qeverinë e Shqipërisë, nuk përfaqësojnë këtë shumicë qeverisëse dhe besimin e dhënë tre herë me rradhë nga qytetarët, do t’u duhet të përballen me drejtësinë. Dhe nuk do ta kenë të lehtë.

Nuk mbaron me kaq.

Do të vendos në kallëzim edhe drejtuesin e tyre, si person në dijeni të paktën, sepse drejtuesit e këtyre agjensive dhe këtyre institucioneve nuk mund të bëjnë të paditurin për veprimet e këtyre inspektorëve. Nuk po akuzoj këtu drejtuesin, sepse drejtuesit jo domosdoshmërisht janë pjesë e këtyre gjobave të dhunshme, por sepse drejtuesit duhet ta dinë në kohë reale veprimtarinë e këtyre inspektorëve në terren dhe duhet të marin informacion të argumentuar për çdo gjobë që vihet, për proporcionalitetin e tyre në raport me aktivitetin tregtar që ushtrohet dhe shkeljen e bërë.

Mua nuk më rezulton që në rastin konkret, në këtë institucion të ketë një praktikë argumentimi të gjobave që ju vihen njerëzve. Ne disponojmë prova bindëse dhe gjithë arsyetimin profesional se këto inspektorë duhet të përgjigjen para ligjit, do me thënë përpara prokurorisë.

Ama nga ana tjetër duhet theksuar se pa qytetarin kjo nuk do të ishte e mundur.

Për të respektuar procedurën hetimore dhe për të mos paragjykuar hetimin e mëtejshëm të rastit në fjalë po mjaftohem me faktin se ngjarja ka ndodhur në datat 14 dhe 15.09.2021 në Fier, është e shoqëruar dhe me pamje filmike dhe inspektorët e kallëzuar janë me emër dhe mbiemër. 

Uroj që prokuroria të vihet menjëherë në lëvizje për ti treguar atij qytetari se zëri i tij respektohet dhe është i pa diskutueshëm në prani të provave.

Kam një thirrje shumë të sinqertë për të gjithë qytetarët: Mos u nënshtroni, na vini në provë, na sfidoni me zërin tuaj, dhe nëse ne nuk do ju përgjigjemi atëherë patjetër që ju keni të drejtë të riktheheni te ankesat, te kritikat, tek qarjet, tek mallkimet, pasi jua kanë marrë lekët.

Jua bëj këtë thirje qytetarëve që ankohen për mjekët, për hipotekën, për legalizimet, për pyjet, për mjedisin, për faturat, për policinë dhe për çdo lloj inspektori në këtë territor.

Kjo është një betejë që ne mund ta fitojmë, por ne nuk e fitojmë dot pa qytetarët. Duhet të jemi bashkë, sepse halli I njërit prej jush sot, nesër bëhet edhe halli I tjetrit, tjetrit e kështu me rradhë. Dhe këto shushunja, këta Taxhimë Ymerë që kërkojnë bekajete, fryhen me vulën e shtetit e me punën, djersën e gjakun tuaj. Së bashku I ndalim.

Po ju kujtoj, se në platformën e bashkqeverisjes shqipëria.al, keni mundësinë që me një klik të na njoftoni dhe ne e ruajmë deri në fund identitetin tuaj.

Dhe kjo është dhe arsyeja që unë me gjithë dëshirën e madhe për ta falënderuar me emër dhe mbiemër atë qytetar nuk e bëj dot, por do ta falënderoj sot që dosja është gati dhe që po e dërgoj në prokurori  dhe nëse ai do ma lejojë me shumë kënaqësi do ta bëj një foto me të ditën që drejtësia do të thotë fjalën e saj për këtë rast.

Takimi i radhës do të jetë për kallëzimet për hipotekën dhe për legalizimet.

Sondazh

Poll

Lexo gjithashtu