Ivanov nuk i jep mandatin Zaevit: Hiq dorë nga platforma shqiptare

Presidenti i Maqedonisë Gjorgje Ivanov nuk ka pranuar t’i japë mandatin për formimin e qeverisë liderit të LSDM, Zoran Zaev.

Ivanov i ka kërkuar Zaevit të heqë dorë nga platforma shqiptare, të cilën e ka quajtur të rrezikshme për stabilitetin e Maqedonisë. Presidenti maqedonas ka thënë se pranimi i platformës shqiptare përbën vepër penale.

“I kërkova Zaevit të hedhë poshtë platformën shqiptare. Me këtë platformë Maqedonia është e kërcënuar pasi kjo platformë paraqet ndërhyrje në punët e brëndshme të shtetit. Ndërkombëtarët të mos imponojnë zgjidhje”, ka thënë ai.

Platforma shqiptare është firmosur nga krerët e partive shqiptare në Maqedoni dhe parashikon respektimin e marrëveshjes së Ohrit, zyrtarizim të gjyhës shqipe, diskutime për simbolet si hymni dhe flamuri si dhe çështje të tjera të rëndësishme që prekin shqiptarët e Maqedonisë.