Gjykata e Posaçme Kundër Krimit dhe Korrupsionit të Organizuar (GJKKO) ka rrezuar kërkesën e ish shefit te Krimeve të Policisë Elbasan, Leonard Palushi, për ndryshim mase.
Ky i fundit ai ndodhet në qeli në masën “arrest me burg”. Palushi kërkoi për herë të dytë zëvendësimin e masës nga “arrest me burg” në “arrest shtëpie” dhe po aq herë iu rrëzua nga GJKKO. Palushi parashtroi si argument arsyet familjare, si dhe faktin se për 4 muaj Prokuroria sipas mbrojtjes kishte kohë të mjaftueshme mblidhte prova që ta çonte çështjen për gjykim.
Kujtojmë se Shefi i Krimeve i transferuar nga Elbasani në Lezhë, akuzohet se ka bashkëpunuar me bandat kur ishte në Elbasan dhe ka ndikuar qëllimisht në devijimin e hetimeve në rrugë të gabuar. GJKKO me kërkesë të SPAK ka dhënë më herët masën e sigurisë “Arrest me burg”.
Leonard Palushi një vit më parë u ndodh në një aksion anti-kanabis ku mbeti i vrarë kolegu i tij Saimir Hoxha. Ky i fundit u qëllua për vdekje nga i riu Aldi Rama, gjatë një kontrolli në Kune-Vain të Lezhës.