"Me iniciativën e ish presidentit të Republikës së Kosovës Behgjet Pacolli javën e ardhshme ish-presidentët dhe kryeministrat e Shqipërisë, bashkë me z.Pacolli do të vizitojnë liderët e Ushtrisë Çlirimtare të Kosovës në Hagë."
Kështu njofton pasditen e kësaj të hëne këshilltari i kreut të AKR-së, Jetlir Zyberaj. Ai tha se ftesa iu dërgua edhe ish-presidentëve të Kosovës, por Fatmir Sejdiu dhe Atifete Jahjaga nuk i janë përgjigjur.
"Ftesa u ishte bërë edhe ish-presidentëve të Kosovës, të cilët për arsye të panjohura nuk e kanë konfirmuar vizitën e tyre. Ish presidentja Jahjaga ka injoruar totalisht secilen thirrje telefonike qoftë edhe thirrjen nëpërmjet letrës", shkruan më tej Jetlir Zyberaj.
Newsbomb.al mëson se deri tani kanë konfirmuar ftesën ish-presidentët Bamir Topi, Rexhep Mejdani dhe Alfred Moisu. Ndërsa, si ish-kryeministër atje do të jetë socialisti Pandeli Majko, por nuk përjashtohet mundësia dhe e emrave të tjerë.
Ftesa që u është dërguar liderëve të Shqipërisë, thotë se takimi me Haxhim Thaçin, Kadri Veselin, Rexhep Selimin dhe Jakup Krasniqin do të bëhet për t'u solidarizuar me ish-krerët e UÇK të cilët prej një viti ndodhen në Hagë, të akuzuar për krime kundër njerëzimit.
"Qëllimi i kësaj vizite është solidarizimi me krerët e UÇK-së që janë të paraburgosur në Hagë dhe mbështetja e kauzës dhe luftës së drejtë të Kosovës për liri dhe pavarësi kundër Serbisë në vitet e 90-ta.
Ka momente kur polarizimi nuk i ndihmon interesit kombëtar të vendit dhe ky është një prej tyre, por uniteti është përgjigja ndaj agresionit të Serbisë kundër historisë, të tashmes dhe të ardhmes së Kosovës", përmbyll njoftimin e tij këshilltari i partisë së Pacollit.