I dyshuari si atentatori kryesor ndaj prokurorit Arjan Ndoja dhe dy personave të tjerë, Redjan Rraja refuzon në mënyrë kategorike që të ketë qenë fshatin Shkafanë, ku u gjet e braktisur makina e atentatorëve.
Megjithatë, provat e gjetura në makinën e grabitur ‘’Benz’’ ngjyrë gri nxjerrin në dritë një version tjetër. Hetuesit gjetën në këtë automjet syzet e Rrajës. Gjatë ekspertizës u zbuluan se në pjesë të ndryshme të tij ka shenja të gishtave të Redjan Rrajës.
Ndërkohë, në media po qarkullon dhe fotoja e tij.
Rraja u ndalua në pikën kufitare të Murriqanit nga policia në tentativë për t’u larguar nga Shqipëria. 34-vjeçari është ndeshur me ligjin në dy raste: në atentatin ndaj Elton Çiçës në zonën e ish-bllokut në vitin 2016, ku u dënua me 8 muaj burg për fshehjen e telefonit dhe pistoletës së Elton Çiçës, të cilin e kishte mik. Herën e dytë lidhet me rastin e Xhisiela Malokut, ku oficeri i komisariatit të Fushë-Krujës Emiliano Nuhu akuzoi Redjan Rrahjën se e ka kërcënuar të mos ndiqte hetimet pasi ishte i përfshirë Rexhep Rrahja, i afërm i tij.