Katër vajza të reja të cilat sot janë gra, janë mbajtur me dhunë si skllave nga bashkëshortët e tyre dhe babai shqiptar, në mes të Zvicrës, për 16 vite me radhë. Historia tronditëse ëhstë zbuluar së fundmi në Bernë, nga mediat vendase dhe babai me katër djemtë janë tashmë në gjyq.
Javën e ardhshme, një baba kosovar, i identifikuar si Albrim F. 65 vjeç, me katër djem do të dalë para gjykatës rajonale të Moutier Bernë. Akuza: Thuhet se ai ka sjellë një vajza nga mosha 14 deri në 17 vjeçe si “gra” nga Ballkani në Jura Bernese për secilin nga katër djemtë e tij. Këtu, për një dekadë e gjysmë, babë e bij abuzonin me gratë dhe i detyruan të bënin punët e shtëpisë.
Viktima e parë u soll në Zvicër nga Shqipëria në vitin 2003. 17-vjeçarja e atëhershme e njihte burrin e saj vetëm nga fotot, martesa e detyruar ishte rregulluar nga vjehrri. Prindërve të së resë iu premtuan se vajza e tyre do të kishte një jetë më të mirë në Zvicër. Një vajzë tjetër ishte vetëm 14 vjeç, jetonte në varfëri dhe sipas hetuesve, prindërit e saj ia shitën burrit ksoovar për një shumë prej 300 eurosh.
Gratë u izoluan dhe u kërcënuan me jetë
Jeta gjoja më e mirë doli shpejt të ishte një kurth. Sipas aktakuzës, babai kosovar u Albrim F. 65 vjeç i udhëzoi djemtë e tij saktësisht se si të silleshin me “gratë” e tyre: me dhunë brutale fizike dhe psikologjike. Gratë janë rrahur, poshtëruar, kërcënuar me vdekje, izoluar dhe dhunuar vazhdimisht nga anëtarët e familjes, raporton media zvicerane.
[caption id="attachment_640264" align="alignnone" width="855"]
Kryefamiljari Albrim F. (65) është në bankën e të akuzuarve me katër djem[/caption]
"Më shumë se 20 herë e ka goditur me brez (rrip pantallonash)”, thuhet në aktakuzën e njërit prej të pandehurve. Ose: “Edhe pse ishte shtatzënë, ai e ka rrahur nusen deri sa i ka dalë gjak dhe i ka shtrënguar fytin me të dyja duart”. Njëra prej viktimave duhej t'i lante këmbët vjehrrit dhe kunatit çdo mbrëmje. Akuzat mbushin 30 faqe.
Gratë rrallë lejoheshin të dilnin vetëm nga banesa dhe nuk kishin pothuajse asnjë kontakt me familjet e tyre në shtëpi. Ato duhej të bënin punët e shtëpisë nga mëngjesi në mbrëmje. Pas 16 vitesh në Zvicër, asnjëra nga gratë nuk mund të fliste një gjuhë kombëtare, ato ishin ilegale atje.
Më në fund viktimat janë në një vend të sigurt
Avokati Dominic Nellen përfaqëson dy nga gratë në gjykatë dhe i ka shoqëruar për tre vjet. “Gratë janë të mbrojtura mirë nga gjyqësori. Janë në një vend të sigurt”, thotë ai për Blick. Avokati nuk mund të thotë asgjë për rreth dhjetë fëmijët që kanë lindur në familje - për t'i mbrojtur ata.
Klientet e tij janë të traumatizuar rëndë: “Ata vinin si të mitura, ndonjëherë duke kaluar kufirin e gjelbër. Ato duhej të ecnin nëpër pyll gjithë natën. Dhe më pas u përdhunuan nga ata që u bënë burrat e tyre menjëherë pas mbërritjes në Zvicër. Kjo i theu këto gra."
[caption id="attachment_640262" align="alignnone" width="1100"]
Artikulli ne median zvicerane, per babain kosovar dhe djemte e tij[/caption]
Për Nellen është e qartë: Pas sjelljes çnjerëzore qëndron e drejta zakonore mesjetare shqiptare e kanunit. Të gjitha fijet u bashkuan me kreun e familjes Albahrim F.: “Është një klan i madh familjar me sundimtar patriarkal vjehrrin. Ishte në qendër, jepte urdhrat”.
Autoritetet Bernese u morën në dijeni për familjen. “Shërbimi social filloi të vendosë kushte. Për shembull, që gratë duhet të ndjekin kurse gjuhësore dhe të kërkojnë punë.” Ishte hapi i parë drejt lirisë: “Ata e kuptuan se një abuzim i tillë nuk është normal”. Dhe: “Para se autoritetet të vendosnin kushte, të gjithë jetonin nën një çati”.
Të pandehurit mohojnë çdo faj
Në vitin 2019, gratë më në fund arritën të arratiseshin - 16 vjet pasi viktima e parë u soll në Zvicër. Sipas aktakuzës, ishte përfshirë edhe një agjenci për mbrojtjen e viktimave. Aktakuza tregon gjithashtu se asnjë nga të akuzuarit nuk ka kaluar më shumë se një ditë pas hekurave.
“Burrat mohojnë të kenë kryer ndonjë gjë të paligjshme. Gratë ishin dakord me gjithçka”, thotë avokati i viktimave.
Të akuzuarit përballen me dënime, ndër të tjera, për trafikim njerëzor, martesë të detyruar, lëndim fizik, shtrëngim, përdhunim dhe akte seksuale me fëmijë. Dënimi i kërkuar do të shpallet vetëm në gjyq. Një avokat i njërit prej djemve i thotë Blick se ai dëshiron të pretendojë për lirim. Për Blick, të pandehurit e tjerë dhe avokatët e tyre mbrojtës nuk mund të kontaktoheshin për koment ose nuk donin të thoshin asgjë. Është prezumimi i pafajësisë.
* Emri i ndryshuar
© Marrë nga Blick.Ch, përktheu dhe përshtati në shqip, Newsbomb Albania
media
babai kosovar
Sondazh
Lexo gjithashtu
