Drejtori i Përgjithshëm i Policisë së Shtetit, Gledis Nano, ditën e sotme është paraqitur pranë ambienteve të Prokurorisë së Posaçme.
Mësohet se Nano po zhvillon një takim me kreun e SPAK, Arben Kraja, ku në fokus të këtij takimi janë hetimet e grupeve kriminale, hetimet pasurore dhe ekzekutimi i vendimit të Gjykatës për sekuestron ndaj pronave të Anton Gjinajt.
Kujtojmë se ditën e sotme Gledis Nano firmosi ndryshimet në kupolën drejtuese të Policisë së Shtetit. Drejtori i Policisë Kriminale, Tonin Vocaj u emërua si zv.drejtor i policisë duke i zënë vendin Albert Dervishaj. Ky i fundit u emërua në Akademi.
Ndërkohë, Tonin Vocaj u zëvëndësua nga Neritan Nallbati, i cili deri më tani ishte drejtues i policisë së Durrësit.
Këto ndryshime kanë ardhur në një periudhë ku janë shënuar një sërë ngjarjesh kriminale në vend, me atentate të një pas njëshme.