Deputetja Rudina Hajdari ka paralajmëruar sërish kryeministrin Edi Rama, duke thënë se hapja e listave është një kusht i panegociueshëm për opozitën parlamentare.
Me anë të një postimin në ‘Facebook’ Hajdari shkruan se 75% e shqiptarëve e mbështesin dhe duan hapjen e listave si një mjet për të patur më shumë fuqi mbi vendimarrjen në Parlament.
“Dje i bëmë të qartë Edi Ramës se hapja e listave është një kusht i panegociueshëm për miratimin e reformës zgjedhore dhe marrveshjes Rama-Basha. Sot, mbi 75% e shqiptarëve e mbështesin dhe duan hapjen e listave si një mjet për të patur më shumë fuqi mbi vendimarrjen në Parlament. Misioni ynë është që në parlament të përfaqësojmë këtë shumicë dërrmuese shqiptarësh e jo dëshirat e 2 apo 3 kryetarëve që kanë frikë nga populli,” shkruan Hajdari në postimin e saj.
Kujtojmë që deklarata e Hajdarit vjen një ditë pas takimit me kryeministrin Rama, i cili tha se nëse do të diskutohen kushtet e opozitës jashtëparlamentare, si hapja e listave, duhet të kryhet përmes një konsensusi trepalësh.