GJKKO ka pranuar kërkesën e Pëllumb Abeshit, ish-zyrtarit të Ministrisë së Mjedisit për tu liruar nga burgu.
GJKKO njofton se dy ditë më parë më datë 8 janar Pëllumb Abeshi ka paraqitur pranë Gjykatës së Posaçme kërkesën me objekt: Shuarjen e masës së sigurimit “Arrest në burg” të caktuar ndaj tij më 27.03.2022.
Pas shqyrtimit të kërkesës GJKKO vendosi sot lirimin e menjëhershëm nga burgu të Pëllumb Abeshit.
Pëllumb Abeshi u la në burg në vitin 2022 pasi u akuzua lidhur me inceneratorët, pasi kishte firmosur bashkë me ish-ministrin Lefter Koka dhe ish-deputetin e PS-së, Alqi Bllakon disa dokumente, duke falsifikuar, për tjetërsimin e pronës për ndërtimin e inceneratorit të Fierit.
NJOFTIMI
I pandehuri Pëllumb Abeshi më datë 08.01.2024 ka paraqitur pranë Gjykatës së Posaçme me objekt: Shuarjen e masës së sigurimit “Arrest në burg”, parashikuar nga neni 238 i K.Pr.Penale, caktuar ndaj tij me vendimin 20, datë 27.03.2022 të Gjykatës së Posaçme të Shkallës së Parë për Korrupsionin dhe Krimin e Organizuar.
Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Elsa Ulliri, Irena Gjoka dhe Flora Hajredinaj, bazuar në nenet 261, gërma “c” dhe 262 të Kodit të Procedurës Penale, me vendimin Nr. 31, datë 10.01.2023, vendosi:
Pranimin e kërkesës.
Shuarjen e masës së sigurimit “Arresti në burg”, caktuar ndaj shtetasit Pëllumb Abeshi me anë të vendimit Nr.20Akti, datë 27.03.2022 të Gjykatës së Posaçme të Shkallës së Parë për Korrupsionin dhe Krimin e Organizuar.
Urdhërohet lirimi i menjëhershëm i të pandehurit Pëllumb Abeshi nëse nuk mbahet i dënuar, i arrestuar apo i ndaluar për ndonjë vepër tjetër penale.
Ngarkohet Prokuroria e Posaçme kundër Korrupsionit dhe Krimit të Organizuar për ekzekutimin e këtij vendimi.
Kundër këtij vendimi lejohet ankim në Gjykatën e Posaçme të Apelit për Korrupsionin dhe Krimin e Organizuar, brenda 5 ditëve, duke filluar ky afat nga e nesërmja e komunikimit të vendimit.
U shpall sot në Tiranë, me datë 10.01.2024
Gjykata e Posaçme e Shkallës së Parë për Korrupsionin dhe Krimin e Organizuar
Sondazh
Lexo gjithashtu
