Të paktën 21 persona kanë vdekur, si pasojë e fundosjes së një anije me emigrantë ilegalë në Detin e Zi. Roja bregdetare e Turqisë ka njoftuar se 5 persona konsiderohen të zhdukur, ndërkohë 40 emigrantë u shpëtuan nga fundosja e anijes.
Anija e peshkatarëve, që transportonte emigrantët për në vendet e Europës është fundosur në orët e para të mëngjesit të djeshëm afër bregdetit në Kefken, 200 kilometraa në lindje të Stambollit. Autoritetet lokale thanë se pjesa më e madhe e emigrantëve ishin irakianë, të cilët po përpiqeshin të kalonin në Rumani. Kapiteni i anijes ishte sirian, sakaq policia është në kërkim të trafikantëve të tjerë.