Katër shqiptarë janë arrestuar nga policia në Britaninë e Madhe gjatë një aksioni anti-kanabis në Neath.
Një ekip policor nisi aksionin në 18 tetor në Payne Street pranë zonës Melin të Neath, kur trokitën në derën e banesës, e cila u hap nga shqiptari Elton Musta. Pasi i treguan se përse kishin shkuar, ata hynë brenda banesës ku kryen edhe tre arrestime. Një person arriti të largohej nga dritarja e katit të dytë, i identifikuar si Ledian Xhafa, por policët arritën ta prangosin në fund të rrugës.
Në shtëpinë e tyre policia nuk gjeti kanabis, por sekuestruan pasaportat si dhe telefonat e tyre të mbushura me selfie ku shqiptarët reklamonin paratë si dhe bimët me kanabis. Përballë shtëpisë u gjet edhe një makinë që përdorej nga shqiptarët, e mbushur me pajisje dhe pleh kimik për kultivimin e kanabisit.
Gjithashtu u gjetën mesazhe telefonike që implikonin shqiptarët në kultivimin e drogës.
Policia vendosi të qëndrojë brenda ambienteve të shtëpisë, teksa dy shqiptarët u transferuan në paraburgim. Nuk kaloi shumë kohë dhe në shtëpi hynë dhe dy shqiptarë të tjerë Renato Shyti dhe Lorenc Cobo. Edhe këta u arrestuan me të njëjtat akuza.
Duke përfituar nga pranimi i fajësisë, shqiptarëve iu ul një e katërta e dënimit dhe u dënuan secili me nga 36 javë burg. Ata do të kryejnë deri në gjysmën e këtyre dënimeve në paraburgim dhe më pas mund të lirohen me kusht.
