Aktivistja për mbrojtjen e mjedisit Greta Thunberg është në mesin e të arrestuarve nga Policia gjatë një proteste në Gjermani.
20- vjeçarja mori pjesë në protestën kundër prishjes së fshatit Luetzerath, i cili po pastrohet për t’i hapur rrugë zgjerimit të një miniere qymyri në Gjermani.
Sipas medieve të huaja, fshati i vogël, i cili është në pronësi të firmës së shërbimeve RWE dhe është braktisur, është bërë vija e parë për debatin e Gjermanisë për klimën. Ndërkohë qeveria gjermane ka dhënë dritën jeshile që fshati të prishet për të lejuar zgjerimin e minierës së qymyrit Garzëeiler aty pranë.
Aktivistët e mjedisit kërkojnë që Gjermania të ndërmarrë veprime të menjëhershme për lëndët djegëse fosile dhe po kundërshtojnë zgjerimin e minierës së qymyrit. Sipas tyre shkatërrimi i fshatit për t’i hapur rrugë vendit do të rezultonte në sasi të mëdha të emetimeve të gazit serrë nga lëndët djegëse fosile të minuara.