Analisti Fatos Lubonja thotë se vendimi i DASH që shpalli Sali Berishën person “NON GRATA” në Amerikë, është një vendim që “fsheh” interesa të tjera dhe jo për demokracinë e Shqipërisë.
Sipas Lubonjës, “regjimi i Edi Ramës” është rreziku më i madh për demokracinë në Shqipëri dhe jo Sali Berisha, pasi ky i fundit nuk ka pushtet dhe nuk përbën problem. Në “Real Story”, ai u shpreh se vendimi për Berishën mund të lidhet dhe me lobingje që bëhen në Amerikë.
“Unë vazhdoj t’i qëndroj tezës më mirë tre banda se një bandë. Por nëse bëhet fjalë për demokracinë në Shqipëri, shoh një rrezik të madh, një parti ka kapur shtetin të gjithë. Nuk shoh asnjë ndërhyrje në këtë mes. Dhe për mua kjo qartazi është mbështetje për njërën anë. Pse mbështesin Edi Ramën këta kur ai është problem sot, jo Berisha.
Kjo s’ka të bëjë me demokracinë. Por më shumë me interesa politike. Unë bëj pyetjen, cilat janë interest amerikane. Kam dy hipoteza. Njëra është që lidhet me lobinjgje që bëhen atje. Mund të jenë lobinjgje të caktuara.
Ky është një rast shumë i keq për mua. Kur Amerika bën këtë veprim, për mendimin tim nuk është prezente siç duam ta mendojmë ne, por e bën sepse do të mbështesë një regjim për interest e veta. Unë nuk e di sot”, tha Lubonja.