Kryetarja e LSI, Monika Kryemadhi ka komentuar listat e Partisë Socialiste të bëra publike mbrëmjen e kaluar nga sekretari i Përgjithshëm i saj, Taulant Balla.
Duke folur për “Syri.tv”, ajo e cilësoi listën e PS si një listë humbëse dhe që tregon frikën e Edi Ramës dhe një tentativë për të mbajtur peng partinë pas humbjes së 25 prillit.
Kryemadhi: Unë e lexoj frikë të Edi Ramës dhe një listë humbëse për të përgatitur kontrollin dhe mbajtjen peng të PS. Largimi i figurave si Musa Ulqini, Besnik Bare, Pandeli Majko, Fatmir Xhafa, Vasilika Hysi, apo i shumë e shumë grave e burrave të tjerë që janë të PS, të cilët nuk janë pjesë përbërëse e listave, përkundrazi janë larguar, sekterisur larg territorit socialist, për mua tregon se Rama ka frikën për krijimin një grupi parlamentar në parlamentin e ardhshëm opozitar, të cilin kërkon ta ketë si një grup që do t’i shërbejë si një lloj negociatori për veten e tij, alibi për veten e tij, apo për të kërkuar një liri me kusht për veten e tij politike. Nga ana tjetër, unë shikoj frikën që ka Rama nga ky grup socialistësh të vjetër, duke filluar që nga Gramzo Ruçi i pari, që për hirë të vërtetës ai nuk e ka problem vendosjen në numrin 8, por sa më shumë ka të bëjë për vlerësimin dhe respektin që Rama i jep historisë së PS, figurës së Ruçit e socialistëve të tjerë, pavarësisht mendimeve personale që mund të kemi ne. Shanset dhe mundësitë që socialistët nuk e gjejnë veten të listat e Rilindjes e gjejnë veten te kandidatët socialistë tek LSI-ja.