Ish-presidenti amerikan Donald Trump u ka bërë thirrje mbështetësve republikanë që të vaksinohen kundër COVID-19, duke thënë se ai e rekomandon një gjë të tillë.
Në një intervistë televizive, ai ka thënë se vaksina është “e sigurt” dhe “diçka që funksionon”. Baza e përkrahësve konservatorë të Trumpit ka qenë një prej grupeve kryesore që i ka rezistuar programit të vaksinimit.
“Do ta rekomandoja atë”, ka thënë Trump në një intervistë për Fox News. “Do t’ua rekomandoja shumë njerëzve që nuk duan ta marrin atë dhe shumë njerëzve që votuan për mua, sinqerisht”, është shprehur ish-presidenti.
Ai ka shtuar se vaksina është “e mrekullueshme, është e sigurt dhe diçka që funksionon”.