Kreu i Vetëvendosjes Albin Kurti, njëherësh fitues i zgjedhjeve të parakohshme që u zhvilluan në Kosovë në muajin shkurt, i përgjigjet kryeministrit të Izraelit Benjamin Netanyahu.
Kreu i qeverisë izraelite e ftoi Kurtin në Izrael sapo ai fitoi zgjedhjet, për të hapur Ambasadën e Kosovës në Jerusalem.
Ndërkohë, Kurti sot i është përgjigjur homologut të tij dhe e falenderon për ftesën. Kryeministri i ardhshëm i Kosovës thotë se do ta vizitojë Izraelin “në një kohë të përshtatshme”, por nuk specifikon datë.
Madje, Kurti nuk e përmend fare as temën për hapjen e Ambasadës në Jerusalem.
“Kombi ynë ka qenë historikisht respektues ndaj komunitetit çifut. Si kryeministër i ardhshëm i Republikës së Kosovës, do ta kem kënaqësinë që t’i adresoj çështjet relevante të komunitetit çifut dhe trashëgimisë së tij në vendin tonë”, thuhet ndër të tjera në letrën e Kurtit.