Efektivi i FSHN-së, Xhulio Prela u vra në orët e para të mëngjesit të 5 dhjetorit, teksa po udhëtonte me makinë drejt Tiranës.
Deri në këto momente policia ka arrestuar Nikoll Shernikun, pasi dyshohet se ky person është vënë në dijeni për ngjarjen dhe mund të dijë edhe emrat e autorëve.
Ndërsa autori tjetër i dyshuar është Brilant Martinaj, kushëriri i biznesmenit Ervis Martinaj.
Sipas informacioneve për mediat, Brilant Martinaj është shpallur në kërkim sepse natën e krimit me 5 dhjetor 2020, ka lëvizur me makinë afër vendit ku u vra Xhulio Prela.
Ndërkohë që disa ditë pas vrasjes ai është larguar jashtë shtetit, pasi mendohet se një familjar i tij po kurohet në Turqi për problemet me shëndetin.
Mediat kanë raportuar se Brilant Martinaj pritet që të paraqitet vetë në komisariat dhe të sqarojë pozicionin e tij në këtë ngjarje.
Mendohet se Xhulio Prela dhe 2 autorët janë përplasur me njëri-tjetrin për shkak të dritave të gjata të makinës, konflikt i cili ka përfunduar me vrasjen e të riut.
Si ndodhi ngjarja?
Mëngjesin e 5 dhjetorit, rreth orës 02.00, Xhulio po kthehej nga Lezha drejt Tiranës. Efektivi i FNSH në autostradën Lezhë-Milot, është përballur me një person i cili i ka bërë shenjë me elektrik dore që të ndalonte. Nuk dihet deri tani nëse ky person ishte i njohur për 26 vjeçarin, por nga burimet thuhet se Xhulio ka ndaluar dhe ka debatuar me këtë person.
Këtë e kanë konfirmuar dhe hetuesit, të cilët në vendngjarje kanë parë se xhami i shoferit ishte i ulur, çka tregon se viktima ka ndaluar dhe ka folur me personin që i ka bërë shenjë. Teksa debatonte me këtë person, pranë makinës me të cilën Xhulio Prela udhëtonte është afruar një mjet tjetër.
Sapo është afruar pranë makinës ku ndodhej Xhulio, nga mjeti tjetër është hapur zjarr me një pistoletë TT. Aty efektivi i FNSH ka tentuar të largohet por në lëvizje e sipër një nga tre plumbat e shkrepur e ka marrë në zemër, duke i shkaktuar vdekjen e menjëhershme. Pas disa metrash makina me të cilën ai udhëtonte ka dalë nga rruga dhe ka përfunduar në kanal.
Personat që e kanë ndaluar Xhulio Prelën në mes të rrugës dyshohet se nuk kanë qenë të rastësishëm, por atentati i tij ka qenë i mirëmenduar sepse autorët kanë studiuar çdo lëvizje të tij. Xhulio Prela ishte pjesë e Forcave të Ndërhyrjes së Shpejt të Shkodrës, por ndërkohë vazhdonte dhe studimet në Akademinë e Sigurisë në Tiranë, në vitin e 3-të.