Në Korçë është kremtuar sot dita e 'Ujit të Bekuar'.
Pas meshës së mbajtur në Katedralen e qytetit, ashtu siç e kërkon tradita është kryer më pas edhe rituali i hedhjes së kryqit në ujë.
Siç shihet nga pamjet pas hedhjes në shatërvan, kryqi është mundur të kapet nga një i ri, pas garës me shtatë të tjerë.
Të rinjët kanë sfiduar temperaturat disa gradë nën zero të qytetit Juglindior.
Në moshën 30 vjeçare, Krishti, Biri i Perëndisë, u shfaq mbi ujërat e lumit Jordan, që të pagëzohet nga Joani Pararendësi dhe Pagëzor. Dhe Jezusi, sapo u pagëzua, qiejtë u hapën, dhe një zë nga qielli tha: “Ky është Biri im i dashur, në të cilin jam kënaqur” shkruhet në ungjill.
Dhe këtu e ka zanafillën besimi se uji i bekuar është mjet pastrimi i shpirtit të mëkatarit ndaj dhe çdo datë 6 janar besimtarët ortodokse bëhen pjesë e ritualit të Ditës së Ujit të Bekuar. Në këtë ditë të shenjtë, uji bëhet ikona e hirit të padukshëm të Perëndisë, që me anë të ujit dhe të Shpirtit i rilind, i pastron, i shenjtëron dhe i ndriçon njerëzit besimtarë në Krishtin.