Opozita e drejtuar nga ish-kryeministri Sali Berisha, duket se ka vendosur të mos lejojë zhvillimin e asnjë seance parlamentare, duke bllokuar foltoren e Kuvendit.
Kjo është seanca e tretë në radhë që dështon të zhvillohet në normalitet, që prej nisjes së punimeve për këtë vit të ri.
Opozita pretendon se sjellja jo në përputhje me rregulloren e kryetares së Kuvendit Lindita Nikolla, si dhe mungesa e kryeministrit Edi Rama, janë shkaktare të tensioneve në sallë.
Por kryetari i grupit parlamentar të PS-së Taulant Balla mendon ndryshe.
Balla tha sot se tashmë duket qartë se “foltorja” e PD-së ka vendosur të mos lejojë zhvillimin normal të asnjë seance në Kuvend. Ai tha se të njëjtën gjë, Berisha e bëri edhe para se të bëhej publike çështja McGonigal.
Duket se diçka të tillë e konfirmon edhe vetë deputeti demokrat Edmond Spaho. Pas tensioneve në seancën e sotme ai ka shkruar në rrjetet sociale: “Kështu do ta ketë perballë opozitën Rama deri sa të shporret”.
