Në selinë e Partisë Demokratike po zhvillohet mbledhja e thirru nga kryedemokrati Lulzim Basha me kryetarët e degëve, ku po analizohet humbja e zgjedhjeve të 6 Marsit.
Ndryshe nga deputetët, kryetarët e degëve i kanë dalë në krah Bashës dhe i kanë kërkuar që të mos japë dorëheqjen, pasi përgjegjësia nuk është e tij. Madje ka patur nga ata që ia kanë hedhur fajin deputetëve, siç është rasti i ish-kryebashkiakut të Lezhës, Fran Frrokaj, i cili u shpreh se deputetët nuk duhet të vinin në fushatë me “Versace”, por për të punuar.
“Falenderoj 6 kandidatët. Nga 6 bashki 5 kanë qenë të majta. Nuk ka ndodhur që në zgjedhje të pjesshme të fitojë opozita. Mos të shkojnë deputetët me Versaçe, por të shkojnë për të punuar. Duhet të kthjellohemi e të gjykojmë”, u shpreh ai.
Ndërsa kreu i PD në Mirditë, Mark Ruçi, tha se PD duhet të krijojë një strategji për fitimin e zgjedhjeve.
“Duhet një strategji që të dimë si të ecim nesër në zgjedhje. Makineria e pushtetit vijon vijën e partisë së pushtetit të parë (komunizmit). Duhet të konsultohemi me njerëzit që të marrim përgjegjësi. Duhet të qetësohemi e të logjikojmë. Falendëroj kandidatët që përballuan një garë të pabarabartë”, tha Ruçi.
Më herët, edhe kryetari i PD në Rrogozhinë, i cili doli i treti në zgjedhjet e 6 Marsit, e hoqi përgjegjësinë nga Basha dhe e mori vetë, duke dhënë dorëheqjen.