Kryeministri Edi Rama thotë se nuk do t’i përgjigjet asnjë pyetje në komisionin hetimor për inceneratorët, nëse kryetarja Jorida Tabaku bën komente të natyrës “inkuizicionale” dhe “kooperativiste”.
Rama akuzoi Tabakun se ka cënuar dinjitetin e dëshmitarëve duke bërë komente të panevojshme gjatë marrjes në pyetje.
“Ju keni opinionin tuaj, ju s’mund të thoni sapo u provua kjo, sapo u provua ajo. Lerja Fevziut këto, mos ia merrni atë me të cilën jeton. Keni cënuar dinjitetin e dëshmitarëve nga fillimi në fund”, tha ndër të tjera Rama.
Pjesë nga debati:
Felaj: E kemi toleruar këtë mënyrën që kryetarja merr mikrofonin dhe bën 51 pyetje, jo nuk mund të jetë kështu. Pyesin të gjithë kolegët me radhë. Që kjo punë e këtij komisioni të mos pengohet, kërkoj ta marr fjalën unë.
Tabaku: Ju e njihni shumë mirë ligjin dhe rregulloren e këtij komisioni. Unë do të kisha dëshirë t’i bëja të gjitha pyetjet e mija. Nëse zoti dëshmitar refuzon, kjo është gjë tjetër.
Rama: Në cilin nen të ligjit të qytetarisë i thuhet tjetrit po aktron. Me çfarë të drejte?
Tabaku: Unë kam disa pyetje të tjera
Rama: Atëherë do të bëjmë, se unë kam ardhur për lekët këtu, jam shumë i interesuar për punën e lekëve. Do rri këtu jo 50 pyetje, por 550 pyetje, por po ju them në sy të gjithë këtyre këtu, ju nuk mund të më ndërprisni për asnjë arsye, nuk komentoni për asnjë arsye përgjigjen time. Sa herë ju bëni komente inkuizicionale apo të natyrës kooperativiste… ju thjeshtë keni marrë dëshmitarë, keni opinionin tuaj, ju s’mund të thoni sapo u provua kjo, sapo u provua ajo. Lerja Fevziut këto, mos ia merrni atë me të cilën jeton. Keni cënuar dinjitetin e dëshmitarëve nga fillimi në fund. Është normale që një koment të bëhet, por kjo histori kështu, rri përpara…unë jam gati ta vazhdojë përgjigjen për 100 milionshin.