Dalin detaje nga plagosja e 18-vjeçarit dy ditë më parë në Tiranë. Policia bëri me dije më herët se autorët e arrestuar tashmë babë e bir, i kanë kërkuar të riut shpjegime se përse u zuri rrugën me kamion. I plagosuri mbeti Mikel Shira, i cili ndodhej si pasagjer në kamionin që drejtohej nga shoku i tij.
Ai mori një plagë arme zjarri në këmbë dhe ndodhet jashtë rrezikut për jetën në Spitalin e Traumës. Ndërkohë autorët e dyshuar të kësaj ngjarjeje, sipas Policisë janë Abedin dhe Steljo Ismailati, 56 e 22 vjeç, babë e bir.
Policia ka vënë në pranga 22-vjeçarin Stelio Ismailati ndërsa më herët është shoqëruar edhe babai i tij 56-vjeçar Abedin Ismailati, banues në Tiranë.
Burime nga grupi hetimor thanë se debati mes autorëve dhe të plagosurit ka nisur për motive banale në një rrugë të ngushtë në zonën e Selitës në Tiranë. Babë e bir, të cilët po udhëtonin me një automjet tip “Golf”, me pretendimin se po vonoheshin për të kaluar në kthesën që ishte zënë nga kamioni, kanë zbritur nga makina e tyre dhe kanë nisur të debatojnë fillimisht me shoferin e mjetit të tonazhit të rëndë.