Nuri Aslan u zgjodh kryebashkiak i përkohshëm i Stambollit të mërkurën për të zëvendësuar Ekrem Imamoglu.
I ardhur nga Partia Popullore Republikane (CHP) e Imamoglu-t, ai u zgjodh në detyrë në votimin e tretë, i cili kërkonte një shumicë të thjeshtë, pasi ai nuk kishte mbledhur votat e nevojshme në dy të parat.
Aslan mori 177 vota kundër 125 për Zeynel Abidlin Okul të Partisë për Drejtësi dhe Zhvillim (AKP) të Rexhep Tajip Erdogan. Ky zhvillim ishte i domosdoshëm pas burgosjes së Imamoglut, i cili akuzohet për korrupsion.
Kryetari i përkohshëm do të drejtojë qytetin për pjesën e mbetur të mandatit të Imamoglu, ndërsa ai pret gjykimin e tij.
Kush është Nuri Aslan?
Nuri Aslan ka lindur në vitin 1969 në Sivas, Turqi. Ai studioi në Universitetin Teknik Yildiz, ku u diplomua në fakultetin e inxhinierisë për arkitekturë detare dhe inxhinieri mekanike. Pas përfundimit të studimeve, ai filloi një karrierë në sektorin privat, duke shërbyer në fund si drejtor i përgjithshëm i një kompanie private.
Në prill 2024, ai u zgjodh nënkryetar i parë i Bashkisë Metropolitane të Stambollit me 184 vota, duke mundur kandidatin e Partisë për Drejtësi dhe Zhvillim (AKP), Ahmet Bilal Kığmaz, i cili mori 129 vota.
Eksperienca e Aslanit në pushtetin vendor dhe organizata të ndryshme qytetare së bashku me marrëdhënien e ngushtë që mban me kryebashkiakun e arrestuar, e bën atë një figurë kyçe në këtë periudhë tranzicioni.
Sondazh
Lexo gjithashtu
