Liderët e Bashkimit Europian kanë arritur një vendim të përbashkët për tre emrat që do të zënë postet kryesore të bllokut për vitet e ardhshme.
Siç raportojnë mediat ndërkombëtare, marrëveshja mbështet treshen e kandidatëve të raportuar më parë: Ursula von der Leyen do të vazhdojë të drejtojë Presidencën e Komisionit Evropian, Antonio Costa për president të Këshillit Evropian dhe Kaja Kallas për Përfaqësuesen e Lartë për Punët e Jashtme dhe Politikën e Sigurisë.
Pavarësisht marrëveshjes së raportuar, vendimi nuk do të bëhet zyrtar derisa 27 liderët të mblidhen në një samit të radhës, që pritet të mbahet gjatë kësaj jave.
Gjashtë liderët e Bashkimit Evropian që veprojnë si negociatorë të partive kryesore të qendrës kanë nënshkruar marrëveshjen paraprake për të ndarë postet kryesore të bllokut pas zgjedhjeve evropiane të qershorit.
Emrat ishin thuajse të finalizuar në mbledhjen jozyrtare të liderëve gjatë javës së shkuar, por siç raportohet, u finalizuan pas një telefonate midis Donald Tusk të Polonisë, Kyriakos Mitsotakis të Greqisë, Olaf Scholz të Gjermanisë, Pedro Sanchez të Spanjës, Emmanuel Macron të Francës dhe Mark Rutte të Holandës.
Tusk dhe Mitsotakis përfaqësojnë Partinë Popullore Evropiane (EPP) të qendrës së djathtë, Scholz dhe Sanchez Socialistët dhe Demokratët (S&D) dhe Macron dhe Rutte familjen liberale të Reneë Europe.
Të tre partitë pritet të punojnë së bashku dhe të ndërtojnë një koalicion të qëndrueshëm që mund të mbështesë mandatin e dytë të Von der Leyen.
Përzgjedhja e posteve kryesore duhet të ratifikohet nga të 27 liderët në një samit vendimtar që do mbahet gjatë kësaj jave, gjatë të cilit ata do të miratojnë gjithashtu Axhendën Strategjike për pesë vitet e ardhshme.
Sondazh
Lexo gjithashtu
