Pas arrestimit të Luigi Maggione, 26 vjeç, si i dyshuari kryesor për vrasjen e CEO-së së UnitedHealth, Brian Thompson, një valë mbështetjeje ka përfshirë publikun amerikan. Shumë qytetarë e shohin Maggione si një figurë heroike, pavarësisht akuzave për vrasje. Fotot e tij të publikuara në media kanë nxitur simpatinë e njerëzve, duke rritur thirrjet për lirimin e tij.
Mijëra individë kanë kontribuar financiarisht për mbulimin e shpenzimeve ligjore të Maggione, duke shoqëruar donacionet e tyre me mesazhe që shprehin mbështetje ose, në disa raste, kënaqësi për aktin që ai dyshohet se ka kryer. Në Nju Jork, qyteti ku ndodhi vrasja, janë shfaqur postera me mbishkrime si "Kërkohet" dhe portrete të drejtuesve të korporatave, ndërsa dyqanet online kanë filluar të shesin produkte të frymëzuara nga rasti, përfshirë kapele me shkrimin "CEO Hunter".
Në komentet e postuara në platformën për mbledhjen e fondeve GiveSendGo, shumë amerikanë shprehin zemërimin e tyre ndaj sistemit të sigurimeve shëndetësore në SHBA. Kritikët akuzojnë kompanitë e sigurimeve për refuzimin e mbulimit të trajtimeve mjekësore dhe për mungesën e ndihmës financiare ndaj pacientëve, duke thelluar pabarazinë ekonomike.
Një nga donatorët shkroi: "Refuzimi për të mbuluar kujdesin shëndetësor është vrasje, por askush nuk përballet me drejtësinë për këtë. Kjo është arsyeja pse unë e quaj vrasjen e Thompson një akt të justifikueshëm." Deri më tani, janë mbledhur mbi 31,000 dollarë për mbrojtjen ligjore të Maggione.
Sondazh
Lexo gjithashtu
