TikTok ka humbur një betejë gjyqësore në SHBA për të penguar një ligj që mund të çojë në ndalimin e platformës në këtë vend.
Një gjykatë, apeli e mbështeti ligjin, duke hedhur poshtë argumentin e TikTok se ligji është antikushtetues. Gjyqtarët deklaruan se ligji “nuk shkel Amendamentin e Parë të Kushtetutës së SHBA” dhe nuk “shkel garancinë e Amendamentit të Pestë për mbrojtjen e barabartë sipas ligjeve.”
Ky vendim sjell TikTok një hap më pranë mundësisë për t’u ndaluar në SHBA, përveç nëse kompania e saj mëmë kineze, ByteDance e shet platformën dhe gjen një blerës, deri më 19 janar 2025.
Pas këtij afati, dyqanet e aplikacioneve në SHBA mund të përballen me gjoba të mëdha për mbajtjen e TikTok. Presidenti Biden mund të lëshojë një zgjatje një herë për këtë afat.
Ligji, i nënshkruar nga Biden në prill, kërkon që TikTok të kalojë në duar të një pronari jo-kinez ose të ndalohet në SHBA për shkak të shqetësimeve mbi sigurinë kombëtare. Shteti amerikan ka shprehur frikën se algoritmi i TikTok, i kontrolluar nga ByteDance, mund të përdoret për të ndikuar në përdoruesit amerikanë.
TikTok ka ngritur padi për të bllokuar ligjin, duke e cilësuar si shkelje të të drejtave të fjalës së lirë për më shumë se 170 milionë përdorues të saj në SHBA. Gjyqtarët kanë pranuar se përdoruesit amerikanë të TikTok angazhohen në shprehje të lira dhe ndërveprojnë me njëri-tjetrin përmes platformës.
Sondazh
Lexo gjithashtu
