Presidenti Donald Trump zhvilloi një bisedë telefonike mbi dy orëshe me Presidentin rus Vladimir Putin ditën e djeshme, si pjesë e një serie telefonatash me liderë botërorë për të negociuar një armëpushim në luftën Rusi-Ukrainë.
Gjatë ditës, Trump pati gjithashtu kontakte telefonike me Presidentin ukrainas Volodymyr Zelenskyy dhe disa udhëheqës evropianë.
Megjithëse Presidenti Putin nuk ra dakord për një armëpushim të menjëhershëm siç është kërkuar prej kohësh nga Ukraina, SHBA dhe shumë vende të NATO-s.
Por si udhëheqësi i Kremlinit ashtu edhe Trump thanë pas telefonatës se Rusia dhe Ukraina do të fillonin bisedimet drejt një paqeje të ardhshme. Trump dhe qeveria e Italisë thanë se Vatikani mund të priste negociatat.
Rusia "është e gatshme të punojë me palën ukrainase për një memorandum mbi një marrëveshje të mundshme paqeje në të ardhmen, duke përcaktuar një numër pozicionesh, të tilla si, për shembull, parimet e një zgjidhjeje, koha e një marrëveshjeje të mundshme paqeje", tha Putin në një konferencë shtypi në qytetin turistik jugor rus të Soçit. Putin e quajti bisedën "konstruktive" dhe falënderoi Trump për përpjekjet e tij diplomatike.
Nga ana tjetër, Trump u shpreh optimist në një postim në rrjetet sociale pas bisedës, duke thënë: “Toni dhe fryma e bisedës ishin të shkëlqyera.” Ai shtoi se, "Rusia dëshiron të bëjë TREGTI në shkallë të gjerë me Shtetet e Bashkuara kur të mbarojë kjo 'gjakderdhje' katastrofike, dhe unë pajtohem".
Megjithatë, në një deklaratë të mëvonshme për gazetarët, Trump la të hapur mundësinë e tërheqjes nga procesi negociator. "Do t'ju them se ka ego të mëdha të përfshira, por mendoj se diçka do të ndodhë. Dhe nëse nuk ndodh, unë thjesht tërhiqem dhe ata do të duhet të vazhdojnë përsëri", tha ai. Trump tha gjithashtu se mbajtja e bisedimeve në Vatikan mund t'u jepte atyre "rëndësi shtesë" dhe të ndihmonte gjërat të ecnin përpara.
Sondazh
Lexo gjithashtu
