Shefja e Bashkimit Evropian Ursula von der Leyen u zotua të martën se tarifat e SHBA-së për çelikun dhe aluminin "nuk do të mbeten pa përgjigje" dhe do të shkaktojnë kundërmasa.
“Më vjen shumë keq për vendimin e SHBA-së për të vendosur tarifa ndaj eksporteve evropiane të çelikut dhe aluminit”, tha von der Leyen në një deklaratë. "Tarifat janë taksa të këqija për biznesin, më keq për konsumatorët. Tarifat e pajustifikuara ndaj BE-së nuk do të mbeten pa përgjigje, ato do të shkaktojnë kundërmasa të forta dhe proporcionale. BE-ja do të veprojë për të mbrojtur interesat e saj ekonomike. Ne do të mbrojmë punëtorët, bizneset dhe konsumatorët tanë."
Kancelari gjerman Olaf Scholz, si drejtues i qeverisë së vendit më të madh eksportues të unionit, kërkoi solidaritet europian për t’iu kundërpërgjigjur tarifave të importit të vendosura nga SHBA. Sipas tij, BE është një treg i madh me 450 milionë banorë, ndaj dhe është në gjendje të shkaktojë kundërpasoja.
Presidentja e Bankës Qendrore Europiane, Christine Lagarde paralajmëroi se tarifat e Uashingtonit mund të shkaktojnë turbullira të reja në Eurozonë, hapësirën e përbashkët monetare europiane, duke vështirësuar mbajtjen e inflacionit në objektivin prej 2%.
Kundërmasa paralajmëruan edhe kryeministri kanadez Justin Trudeau dhe presidentja meksikane Claudia Sheinbaum.
Sondazh
Lexo gjithashtu
