Përgatitjet për një takim midis Vladimir Putin dhe Donald Trump thuhet se janë në një 'fazë të avancuar' pasi presidenti amerikan deklaroi muajin e kaluar se do t'i jepte fund luftës në Ukrainë.
Duke cituar ligjvënësin e lartë Leonid Slutsky, agjencia shtetërore ruse e lajmeve RIA tha të enjten se bisedimet midis dy udhëheqësve ishin të pashmangshme, ndoshta do të zhvillohen në shkurt ose mars.
Kjo është hera e parë që Rusia komenton mundësinë e një takimi me liderin amerikan me një afat kohor dhe konfirmim, raporton Daily Mail.
Shtëpia e Bardhë ende nuk ka komentuar mbi raportet e Rusisë për një takim të mundshëm midis Trump dhe Putin.
Udhëheqësit amerikanë dhe rusë kanë thënë të dy se janë të prirur për të mbajtur një takim, axhenda e të cilit mund të përfshijë kontrollin e armëve bërthamore dhe çmimet globale të energjisë, si dhe qëllimin e deklaruar të Trump për t'i dhënë fund të shpejtë konfliktit në Ukrainë.
Slutsky tha se ai gjithashtu priste që ata të flisnin për situatën në Lindjen e Mesme. “Puna kërkon përgatitje serioze, e cila aktualisht është në një fazë të avancuar”, tha ai.
U sugjerua në fillim të kësaj jave se Rusia po konsideronte Arabinë Saudite ose Emiratet e Bashkuara Arabe si vende për një samit të mundshëm Rusi-SHBA.
Trump kishte thënë disa ditë përpara inaugurimit të tij se po organizohej një takim mes tij dhe Putinit. Nuk u dha asnjë afat kohor se kur mund të zhvillohet takimi, por Kremlini tha në një përgjigje se ishte i hapur për bisedime mbi konfliktin Rusi-Ukrainë, më i madhi në Evropë që nga Lufta e Dytë Botërore.
Hera e fundit që Putin dhe Trump u takuan ishte në samitin Rusi-SHBA në Helsinki, Finlandë në korrik 2018.
Putini është përballur me presion në javët e fundit për të pranuar një marrëveshje për t'i dhënë fund luftës me Ukrainën, pasi Trump i bëri thirrje atij të mbyllte konfliktin.
Sondazh
Lexo gjithashtu
