Ministrat e vendeve anëtare të Aleancës më të madhe ushtarake të globit, kanë përfunduar sot takimin dy ditor, duke trajtuar fushatën e përshkallëzuar të veprimeve armiqësore të Rusisë në vendet e NATO-s.
Aleatët konsideruan një sërë masash për të kundërshtuar sabotimin e Rusisë, duke përfshirë:
- shkëmbim i zgjeruar i inteligjencës,
- më shumë ushtrime,
- mbrojtje më e mirë e infrastrukturës kritike,
- mbrojtje e përmirësuar kibernetike,
- veprime më të ashpra kundër "flotës hije" të anijeve eksportuese të naftës të Rusisë.
Sekretari i Përgjithshëm Mark Rutte tha se NATO “do të punojë ngushtë së bashku me BE-në për këto çështje”. Ai nënvizoi se shtrirja në rritje e Rusisë, Kinës, Koresë së Veriut dhe Iranit nxjerr në pah natyrën globale të kërcënimeve me të cilat përballemi, duke përfshirë rreziqet në rritje të luftës së vazhdueshme në Ukrainë.
Gjatë takimit dy-ditor, Aleatët e NATO-s u takuan me Madhërinë e Tij Mbretin Abdullah II të Jordanisë për të diskutuar situatën në Lindjen e Mesme dhe rëndësinë e bashkëpunimit edhe më të ngushtë të NATO-s me partnerët e saj në rajon.
Ministrat e NATO-s u takuan gjithashtu me Ministrin e Jashtëm të Ukrainës Andrii Sybiha dhe me Kaja Kallas, Përfaqësuesen e re të Lartë të BE-së, në Këshillin NATO-Ukrainë.
Ata diskutuan nevojat më urgjente të Ukrainës, si dhe çfarë mund të bëjnë më shumë aleatët për të siguruar municione kritike dhe mbrojtje ajrore, ndërsa Rusia shton sulmet e saj dhe zgjeron luftën me ndihmën e trupave dhe armëve të Koresë së Veriut.
Rutte vuri në dukje se mbështetja e vazhdueshme për Ukrainën është një prioritet, duke siguruar që, kur të vijë koha, Ukraina mund të negociojë paqen nga një pozicion fuqie.
Sekretari i Përgjithshëm theksoi se “ne duhet të bëjmë më shumë sesa thjesht ta mbajmë Ukrainën në luftë. Ne duhet të ofrojmë mbështetje të mjaftueshme për të ndryshuar trajektoren e këtij konflikti njëherë e përgjithmonë”.
Sondazh
Lexo gjithashtu
