Shtëpia e fëmijërisë së Papa Leo XIV në Dolton, Illinois, është nxjerrë në ankand me çmim fillestar 250,000 dollarë, pas një rritjeje të madhe të interesit që pasoi zgjedhjen e tij si papë javën e kaluar.
Shtëpia me tre dhoma gjumi ndodhet rreth 32 kilometra nga qendra e Çikagos. Fillimisht ishte listuar për 219,000 dollarë në janar, por më 8 maj – ditën kur Kardinali Robert Francis Prevost u shpall Papë – u tërhoq nga tregu pasi u zbulua lidhja me të.
“Para se të emërohej papë, ishte një shtëpi. Tani është shumë më tepër”, tha Misha Haghani nga Paramount Realty, kompania që po menaxhon shitjen.
Papa Leo XIV ka kaluar një pjesë të fëmijërisë në këtë shtëpi dhe ka lidhje të forta me komunitetin katolik në Çikago, ku ka studiuar teologji.
Prona ishte blerë vitin e kaluar për 66,000 dollarë dhe është rinovuar. Ajo qëndroi në treg për disa muaj pa sukses, por më 8 maj mori tetë oferta brenda disa orësh.
Ankandi zgjat deri më 18 qershor, por shitësi mund të pranojë një ofertë në çdo moment. Listimi e cilëson pronën si një “mundësi unike” që u ofron blerësve një pjesë të historisë papnore.
“Nuk po shet më thjesht një shtëpi”, tha agjenti Steve Budzik. “Është diçka aq e rrallë, sa çmimi do ta vendosë vetë tregu.”
Sondazh
Lexo gjithashtu
