Christopher Wray, kreu i Byrosë Federale të Hetimeve (FBI), thotë se do të japë dorëheqjen nga posti i tij përpara se presidenti i sapozgjedhur Donald Trump të marrë detyrën muajin e ardhshëm.
Dorëheqja e tij vjen pasi presidenti i zgjedhur Donald Trump ka thënë se synon ta shkarkojë zyrtarin veteran dhe ta zëvendësojë atë me përkrahësin e tij Kash Patel.
Duke folur në takimin e FBI-së të mërkurën, Wray tha: “Pas shqyrtimit të kujdesshëm javët e fundit, kam arritur në përfundimin se vendimi i duhur për Byronë është që unë të shërbej deri në fund të mandatit të kësaj administrate në janar dhe pastaj të largohem”.
Ai gjithashtu iu drejtua misionit të FBI-së në fjalët e tij, duke thënë se qëllimi i byrosë për të "mbajtur amerikanët të sigurt dhe për të mbështetur kushtetutën" nuk do të ndryshojë.
Wray, i cili u emërua vetë nga Trump në 2017 për të shërbyer një mandat 10-vjeçar, është përballur me kritika gjatë mandatit të tij nga republikanët për shkak të hetimeve të FBI-së ndaj Trump pasi ai u largua nga detyra.
Trump dhe aleatët e tij të vijës së ashpër u kthyen kundër Wray dhe FBI-së në përgjithësi, pasi agjentët e saj ndërmorën një bastisje të miratuar nga gjykata ndaj rezidencës së Trump në Florida në vitin 2022, për të marrë dokumentet e klasifikuara që ai i mori me vete pasi e kishte përfunduar detyrën.
Gjatë mandatit të tij, drejtori aktual Wray tha se ka vepruar në bazë të ligjit dhe se është përpjekur që të kryejë detyrën si drejtues i FBI-së në mënyrë të paanshme. Gjatë një seance dëgjimore para një paneli të Dhomës së Përfaqësuesve ai hodhi poshtë idenë se po ndiqte një agjendë partiake demokrate, duke thënë se tërë jetën e tij kishte qenë republikan.
“Ideja se unë po tregoj njëanshmëri kundër konservatorëve më duket një çmenduri, duke pasur parasysh të kaluarën time”, deklaroi zoti Wray.
Ndërkohë, pas kësaj deklarate të Christopher Wray ka ardhur dhe reagimi i presidenti të zgjedhur të Shteteve të Bashkuara të Amerikës, Donald Trump. Përmes një postimi në rrjetet sociale, Trump nuk ka feshur entuziazmin e tij duke thënë që dorëheqja e Ëray është një ditë e madhe për Amerikën.
“Dorëheqja e Christopher Wray është një ditë e madhe për Amerikën sepse do t’i japë fund armëpushimit të atij që është bërë e njohur si Departamenti i Padrejtësisë së Shteteve të Bashkuara. Tani do rivendosim sundimin e ligjit për të gjithë amerikanët. Nën udhëheqjen e Christopher Wray, FBI-ja më bastisi ilegalisht shtëpinë, pa shkak. Punoi me zell për të më fajësuar dhe inkriminuar në mënyrë të paligjshme dhe bëri gjithçka për të ndërhyrë në suksesin tim dhe të ardhmen e Amerikës”, tha Trump.
Sondazh
Lexo gjithashtu
