Zëdhënësi i Sigurisë Kombëtare të Shtëpisë së Bardhë, John Kirby ka deklaruar se SHBA nuk do të ndërhyjë në luftën midis Rusisë dhe Ukrainës, ndryshe nga sa vepruan me Izraelin.
I pyetur nga gazetarët e huaj, gjatë një konference ditore Kirbi u shpreh se situatat janë të ndryshme dhe se ato nuk mund të përdorin të njëjtat taktika për konfliktin në Ukrainë, ndërsa shtoi se Presidenti Biden e ka bërë të qartë që në fillim të nisjes së luftës Rusi-Ukrainë që nuk do të ndërhynte në rol luftarak.
“E dija se kjo pyetje po vinte. Janë konflikte të ndryshme, hapësira ajrore të ndryshme, pamje të ndryshme të kërcënimit. Presidenti Joe Biden ka qenë i qartë që në fillim të armiqësive në Ukrainë se SHBA nuk do të përfshihet në atë konflikt në një rol luftarak”,- tha në konferencë zëdhënësi i Sigurisë Kombëtare të Shtëpisë së Bardhë, John Kirby.
Ndërkohë që disa ditë më parë, forcat amerikane ndërhynë për të zbrapsur sulmin me raketa të Iranit drejtuar Izraelit, si një shenjë hakmarrje për sulmet izraelite në konsullatën iraniane në Damask të Sirisë. Gjithashtu, në ndihmë të shtetit hebre u renditën edhe disa vende evropiane si Franca, Gjermania dhe Britania e Madhe.
Nga ana tjetër, fuqitë perëndimore janë zotuar të ofrojnë ndihmë për Kievin “për aq kohë sa duhet” për të mposhtur Rusinë. Megjithatë, ata e kanë refuzuar vazhdimisht idenë e angazhimit të drejtpërdrejtë të forcave ruse. Qeveria franceze bëri të qartë se çdo mision hipotetik që do të ndërmerrej, do të ishte që të lehtësonte ushtarët ukrainas nga detyrat jo luftarake, në mënyrë që Kievi të dërgonte më shumë trupa të tij në vijën e frontit, edhe pse nuk e ka përjashtuar dislokimin e trupave në Ukrainë.
Sondazh
Lexo gjithashtu
