Një marrëveshje për mineralet midis Ukrainës dhe Shteteve të Bashkuara mund të nënshkruhet më në fund që të mërkurën, pas javësh negociatash intensive që herë pas here u bënë të ashpra dhe penguan përkohësisht ndihmën e Uashingtonit për Ukrainën.
Një burim i njohur me çështjen i tha CNN se Ukraina pret të nënshkruajë marrëveshjen për burimet natyrore të mërkurën.
Sipas burimeve në Zyrën e Presidentit për gazetën Kyiv Independent, versioni përfundimtar i marrëveshjes përfshin një strukturë investimi 50-50 midis dy vendeve dhe përmban "shumë detaje të mira".
"Shpresoj që do të miratohet së shpejti, gjatë ditës, dhe në mbrëmje sipas kohës sonë. (Ministrja e Ekonomisë) Yulia Svyrydenko do ta nënshkruajë atë", shtuan ata.
SHBA-të dhe Ukraina janë përpjekur të arrijnë një marrëveshje për burimet natyrore që do t'i jepte Uashingtonit akses në pasuritë minerale të pashfrytëzuara të Kievit në këmbim të investimeve, që kur Presidenti i SHBA-së Donald Trump u rikthye në Shtëpinë e Bardhë në janar.
Trump e ka cilësuar kryesisht marrëveshjen si “shpagim” të Ukrainës për ndihmën që SHBA-të i kanë dhënë Ukrainës që kur Rusia nisi pushtimin e saj të paprovokuar në shkallë të plotë të vendit në shkurt 2022.
Presidenti i Ukrainës, Volodymyr Zelensky, pritej ta nënshkruante marrëveshjen gjatë udhëtimit të tij në Uashington në shkurt, por marrëveshja mbeti e pafirmosur kur vizita u ndërpre pas takimit të diskutueshëm në Zyrën Ovale.
Sondazh
Lexo gjithashtu
