Një marrëveshje për mineralet midis Ukrainës dhe Shteteve të Bashkuara mund të nënshkruhet më në fund brenda 24 orëve të ardhshme, pas javësh negociatash intensive që herë pas here u bënë të ashpra dhe penguan përkohësisht ndihmën e Uashingtonit për Ukrainën.
Një burim i njohur me çështjen tha për CNN se Ukraina pret të nënshkruajë marrëveshjen për burimet natyrore që prej ditës së sotme.
Kryeministri ukrainas Denys Shmyhal i tha televizionit ukrainas se ministrja e ekonomisë së vendit, Yulia Svyrydenko, ishte duke shkuar në Uashington.
“Po finalizojmë detajet e fundit me kolegët tanë amerikanë. Sapo të jenë finalizuar të gjitha detajet përfundimtare, shpresoj që marrëveshja të nënshkruhet në të ardhmen e afërt, brenda 24 orëve të ardhshme”, tha Shmyhal për Telemaratonën ukrainase.
Shmyhal e përshkroi marrëveshjen si “një marrëveshje strategjike për krijimin e një fondi partneriteti investimi”.
Lajmi për nënshkrimin e marrëveshjes që të mërkurën u raportua për herë të parë nga Bloomberg dhe Financial Times.
SHBA-të dhe Ukraina janë përpjekur të arrijnë një marrëveshje për burimet natyrore që do t'i jepte Uashingtonit akses në pasuritë minerale të pashfrytëzuara të Kievit në këmbim të investimeve, që kur Presidenti i SHBA-së Donald Trump u rikthye në Shtëpinë e Bardhë në janar.
Trump e ka cilësuar kryesisht marrëveshjen si “shpagim” të Ukrainës për ndihmën që SHBA-të i kanë dhënë Ukrainës që kur Rusia nisi pushtimin e saj të paprovokuar në shkallë të plotë të vendit në shkurt 2022.
Detajet e marrëveshjes nuk janë bërë publike. Megjithatë, Shmyhal tha të dielën se marrëveshja “nuk do të përfshijë ndihmën e ofruar para nënshkrimit të saj”.
“Është vërtet një marrëveshje ndërkombëtare e barabartë dhe e dobishme mbi investimet e përbashkëta në zhvillimin dhe rimëkëmbjen e Ukrainës midis qeverive të SHBA-së dhe Ukrainës”, shtoi ai të mërkurën.
Presidenti i Ukrainës, Volodymyr Zelensky, pritej ta nënshkruante marrëveshjen gjatë udhëtimit të tij në Uashington në shkurt, por marrëveshja mbeti e pafirmosur kur vizita u ndërpre pas takimit të diskutueshëm në Zyrën Ovale .
Sondazh
Lexo gjithashtu
