Presidenti francez Emmanuel Macron i është drejtuar kombit mbrëmjen e kësaj të enjte pas dorëheqjes së kryeministrit Michel Barnier, një ditë pas votimit historik të mosbesimit në Asamblenë Kombëtare që e la Francën pa një qeveri funksionale.
“Do të emëroj një kryeministër të ri në ditët e ardhshme”, tha Macron. "Unë do ta ngarkoj atë për formimin e një qeverie në interesin kombëtar."
Vet, ai theksoi se do të jetë në detyrë si president i vendit deri në vitin 2027. Ai bëri përgjegjës atë që e quajti bashkim të frontit anti-republikan, për rrëzimin e qeverisë së kryeministrit Michel Barnier.
"E djathta ekstreme dhe e majta ekstreme u bashkuan në një front anti-republikan", është shprehur presidenti Emmanuel Macron në mesazhin drejtuar popullit francez. “Nuk mund të ketë zgjedhje të reja parlamentare për dhjetë muaj. Dhe në këto kushte Kuvendi [Kombëtar] ka për detyrë të bëjë atë për të cilën është zgjedhur”, ka shtuar ai.
Mocioni i mosbesimit kaloi me 331 vota në Asamblenë Kombëtare, duke e detyruar Michel Barnier të japë dorëheqjen pas vetëm tre muajsh në detyrë - mandati më i shkurtër i çdo kryeministri në historinë moderne franceze.
Macron tha se deputetët që rrëzuan qeverinë “mendojnë vetëm për perspektivën e zgjedhjeve të reja presidenciale”. Kundërshtarët e tij politikë si Marine Le Pen janë kritikuar për përpjekjen për të detyruar zgjedhje të reja, një akuzë e cila është mohuar.
Fjala drejtuar kombit ishte e regjistruar paraprakisht dhe tani ka përfunduar. Ajo ka zgjatur pak më pak se 15 minuta dhe presidenti u bëri thirrje deputetëve në parlamentin e ndarë që të “punojnë së bashku në shërbim të Francës dhe popullit francez”.
Emmanuel Macron është shprehur se qeveria e re do të formohet "në ditët në vijim" dhe do të hartojë një buxhet të ri që do të prezantohet në fillim të vitit të ardhshëm, i cili sipas tij ishte i nevojshëm për të sjellë investime në Francë.
Sondazh
Lexo gjithashtu
