Këshilltari i lartë i presidentit të zgjedhur të SHBA, Donald Trump, ka deklaruar për BBC se administrata e re do të përqendrohet në arritjen e një paqeje të qëndrueshme në Ukrainë, duke theksuar se objektivi nuk është rikthimi i territoreve të marra nga Rusia.
Brian Lanza, strateg republikan, ka sqaruar se administrata Trump do të kërkojë nga presidenti ukrainas Volodymyr Zelensky të prezantojë një "vizion realist për paqen."
“Nëse presidenti Zelensky e kushtëzon paqen me rikthimin e Krimesë, kjo tregon mungesë serioziteti,” tha ai. “Krimea është e humbur.”
Krimea u aneksua nga Rusia në vitin 2014 dhe që nga ajo kohë, konfliktet janë përshkallëzuar, veçanërisht me pushtimin e plotë rus në Ukrainë që filloi tetë vjet më pas duke përfshirë edhe territore në lindje të vendit.
Lanza, këshilltar politik për Trump që nga fushata e tij e vitit 2016, nuk përmendi specifikisht rajonet lindore të Ukrainës, por theksoi se kthimi i Krimesë nuk është pjesë e qëllimeve të SHBA-së.
“Kur Zelensky deklaron se paqja vjen vetëm me rikthimin e Krimesë, ne e kemi një mesazh për të: Krimea është e humbur,” përfundoi ai.
Sondazh
Lexo gjithashtu
