Presidenti amerikan, Donald Trump, nënshkroi dje një urdhër ekzekutiv që hap rrugën për zgjerimin e operacioneve të minierave në det të thellë nga Shtetet e Bashkuara, me qëllim sigurimin e mineraleve të rralla të tokës, materiale kyçe për mbrojtjen, teknologjinë dhe sektorin e energjisë.
Vendimi i ri vjen në një kohë kur gara globale për këto burime strategjike po intensifikohet, ndërsa Kina vijon të dominojë tregun.
Sipas zyrtarëve të Shtëpisë së Bardhë, kjo nismë mund të çojë në grumbullimin e mbi një miliard tonësh metrikë nodulash minerale në shtratin e detit dhe të injektojë qindra miliarda dollarë në ekonominë amerikane.
Megjithatë, kjo ka ngjallur shqetësime serioze nga grupet mjedisore, të cilat paralajmërojnë për dëme të mëdha ekologjike në ekosistemet e brishta të thellësive të oqeanit.
Pavarësisht kësaj, urdhri i Trump i kërkon Sekretarit të Tregtisë që brenda 60 ditëve të përshpejtojë procesin e rishikimit dhe dhënies së licencave për kërkime minerare dhe shfrytëzim komercial në zona jashtë juridiksionit kombëtar.
Në deklaratën zyrtare thuhet se qëllimi i këtij veprimi është gjithashtu "forcimi i partneriteteve me aleatët dhe industrinë për të kundërshtuar ndikimin në rritje të Kinës mbi burimet minerale të shtratit të detit".
Sondazh
Lexo gjithashtu
