Një sasi e madhe droge është zbuluar nga autoritetet doganore në Kosovë, mbrëmjen e djeshme. Drejtoria për Hetimin e Trafikimit me Narkotikë, ka ndaluar një kamion ‘Iveco’ me targa të huaja të në terminalin doganor, nën dyshimin për substancë narkotike. Shoferi, është shtetas i Serbisë.
Në bashkëpunim me oficerët e Doganës së Kosovës, policia informon se gjatë kontrollit në dy rimorkiot e lidhura janë gjetur vende të modifikuar, ku në brendësi kishte 101 paketime me substancë narkotike të dyshuar të llojit marihuanë.
“Nga Njësia e Forenzikës është bërë sekuestrimi dhe tërheqja e dëshmive, ku pesha e përgjithshme e narkotikëve të sekuestruar ka qenë rreth 107 kilogramë. Po ashtu në cilësi të provave janë sekuestruar edhe një telefon celular, një GPS, disk diagrami i tahografit, një kamion, 95 euro si dhe 2.500 dinarë”, njofton Policia e Kosovës.
Në konsultim me prokurorin kujdestar i dyshuari është ndaluar për 48 orë kurse rasti procedohet për veprime të mëtutjeshme, përderisa vazhdojnë veprimet hetimore nga drejtoria përkatëse.