Ministria e Drejtësisë në Turqi ka nisur procedurat ligjore për të kërkuar nga Tirana arrestimin dhe ekstradimin e Fatih Ozer, i cili akuzohet për mashtrim me miliona dollarë.
Mediat turke madje kanë zbuluar se në lidhje me rastin ministri i Brendshëm i Turqisë, Suleyman Soylu ka zhvilluar një bisedë telefonike me ministrin e Brendshëm, Bledi Çuçi. Biseda ka pasur në thelb arrestimin dhe më pas ekstradimin e Ozer.
Mësohet se kjo bisedë është zhvilluar disa ditë më parë.
Deri më tani policia turke ka ndaluar 62 persona si pjesë e një hetimi në një shkëmbim kripto-valutash, dhe akuzohen për mashtrim investitorësh.
Arrestimet u bënë në kompaninë Thodex, të udhëhequr nga biznesmeni i arratisur Faruk Fatih Ozer, kundër të cilit autoritetet turke kanë lëshuar një urdhër arresti ndërkombëtar.
Faruk Fatih Ozer është shpallur në kërkim me akuzat e mashtrimit duke përdorur sisteme informacioni, banka ose institucione kredie dhe krijimin e një organizate kriminale.