Hapësire reklamuese

Aktualitet

Berisha: Kompania e inceneratorëve do sjellë 100 milionë euro në Shqipëri

Shkruar nga Newsbomb
Berisha: Kompania e inceneratorëve do sjellë 100 milionë euro

Ish-kryeministri Sali Berisha mesditën e kësaj të premte, në koferencën e përjavshme për gazetarët ka bërë publike zhvillimet e fundit lidhur me aferën e Inceneratorit të Tiranës.

Berisha ka zbuluar se ditën e sotme, në kryeqytet kanë ardhur aksionerët e kompanisë “Geogenix BV” , pasi sipas tij kërkojnë që të sjellin 100 milionë euro në Shqipëri, me burime të paqarta, për të bërë investime te inceneratori i Tiranës.

Ish-kryeministri tha se përfaqësuesit e kësaj kompanie do të takohen sot me kryeministrin Edi Rama dhe kryetarin e Bashkisë së Tiranës, Erion Veliaj në orën 13:00 në Agjencinë e Pasurive të Sekuestruara.

“Këta zotërinj që vijnë sot me ndërmjetësimin, sipas burimeve, të Erion Veliajt, unë kam denoncuar lidhjet e hershme të Veliajt me Teheranin, këta kanë gjetur nga burime që duan hetim, 100 milionë euro borxh. Nga kjo ata përfitojnë vetë 25 milionë euro bonus. Më pas këto aksione do ia kthejnë përmes një personi të besuar, Mirel Mërtirit, pra Erion Veliajt. Mërtiri, tani thonë, nga Vjena ka kaluar në Holandë. Madje thuhet se atje ka gjetur si strehë, nuk e di, por prokuroria nuk ka interes fare për këto punë.

Këto janë zhvillime të tjera në aferën e vjedhjes së shekullit ku Erion Veliaj dhe Edi Rama po bëjnë gjithçka që të mbeten pronarë realë të saj.

Sot kanë takimin në ora 1, pas këtij lajmi ndoshta nuk e bëjnë aty, e bëjnë diku fshehtas, por lajmi është shumë i vërtetë”, tha Berisha.

Ndër të tjera, Berisha tha se dokumentat e dorëzuara dje në SPAK nga ish-deputeti Belind Këlliçi hedhin poshtë deklaratat që dy  biznesmenët italianë Franco Tossi dhe Bruno Presezzi kanë bërë sa i përket aferës së Inceneratorëve. Ish-deputeti Belind Këlliçi njoftoi se ditën e sotme i janë dorëzuar drejtuesit të SPAK, Altin Dumanit, 653 faqe me prova dhe dokumente të cilat zbardhin aferën korruptive të Inceneratorëve.

LEXO EDHE: Aferra e Inceneratorëve, Këlliçi: I dorëzuam Altin Dumanit 653 faqe me prova

Pjesë nga fjala e Berishës:

Çështja tjetër që unë desha t’u sjell në vëmendjen tuaj, është një çështje shumë e veçantë.

Sot, me datën 20.10.2023, aksionerët e kompanisë Geogenix BV, kanë ardhur në Tiranë për të zhvilluar një takim pranë Agjencisë së Pasurive të Sekuestruara, pasi kërkojnë të sjellin 100 milionë euro në Shqipëri, me burime të paqarta, për të bërë investime te inceneratori i Tiranës.

Unë ju kam njoftuar këtu në mënyrë të përsëritur për lidhjet e Erion Veliajt me Tosin dhe Alfredo Presecin. Ju kam njoftuar këtu lidhjet e Presecit me kompaninë e ish-komandantit të Pasdaranit, Gardës Revolucionare të Iranit.

Kam paraqitur këtu disa fotografi, dokumente që faktonin këto lidhje.

Ekziston një akuzë e hapur nga një anëtar i këtij grupi, Gabriele, i cili u mbajt këtu në burg disa muaj dhe u lirua pa asnjë akuzë, por me kusht që të mos kthehet më në Shqipëri se ai i dinte të gjitha këto zhvillime të brendshme të këtij grupi supermafioz.

Pra, kam denoncuar këtu udhëtime të Erion Veliajt me Presecin, me çartera, takime të Erion Veliajt, por ajo që është tani, mund t’u them se Belind Këlliçi ka denoncuar dhe faktuar dje me dokumente, ka dorëzuar dosjen në SPAK, në të cilën fakton se këta individë, të marrë në pyetje nga autoritetet italiane, por edhe shqiptare, kanë mashtruar si autoritetet italiane, po ashtu edhe autoritetet shqiptare. Pasi grupi i ekspertëve që punon me zotin Këlliçi, kanë dokumente origjinale që faktojnë të kundërtat e atyre që kanë deklaruar Preseci dhe Tosi në prokurorinë italiane dhe shqiptare.

Sipas deklaratave të tyre, ata nuk kanë lidhje dhe nuk njohin fare Zoton dhe Mërtirin, ndërkohë kur dokumentet e dorëzuara në SPAK, tregojnë se janë takuar me Klodian Zoton dhe Mërtirin shpeshherë gjatë vitit 2022.

Ndërkohë që Klodian Zoto që në vitin 2021 ishte person në kërkim, ndërsa këta takoheshin në vitin 2022.

Takimet, mbledhjet janë zhvilluar në Milano, Zvicër dhe Vjenë.

Këta zotërinj që vijnë sot me ndërmjetësimin, sipas burimeve, të Erion Veliajt, unë kam denoncuar lidhjet e hershme të Veliajt me Teheranin, këta kanë gjetur nga burime që duan hetim, 100 milionë euro borxh. Nga kjo ata përfitojnë vetë 25 milionë euro bonus. Më pas këto aksione do ia kthejnë përmes një personi të besuar, Mirel Mërtirit, pra Erion Veliajt. Mërtiri, tani thonë, nga Vjena ka kaluar në Holandë. Madje thuhet se atje ka gjetur si strehë, nuk e di, por prokuroria nuk ka interes fare për këto punë.

Këto janë zhvillime të tjera në aferën e vjedhjes së shekullit ku Erion Veliaj dhe Edi Rama po bëjnë gjithçka që të mbeten pronarë realë të saj.

Sot kanë takimin në ora 1, pas këtij lajmi ndoshta nuk e bëjnë aty, e bëjnë diku fshehtas, por lajmi është shumë i vërtetë.

 

 

Sondazh

Poll

Lexo gjithashtu

Hapësire reklamuese